Qendra mjekësore “Montefiore” në Bronks të Nju Jorkut do të nisë shumë shpejt provat klinike me plazmën konvaleshente si pjesë e një përpjekje për trajtimin e pacientëve të sëmurë me COVID-19.
Terapia parashikon trajtimin e të prekurve me plazmën e marrë nga pacientë tëshëruar. Në një intervistë për “Zërin e Amerikës” Ervin Mazniku, përgjegjës për provat klinike në këtë spital, bën një vlerësim të mënyrës se si sistemi shëndetësor amerikan u përball me pandeminë, nga problemet me pajisjet mjekësore tek mungesa e testeve në shkallë të gjerë.
“Qendra spitalore “Monterfiore”, ashtu si shumë spitale të qytetit të Nju Jork-ut është një nga spitalet publike që është kthyer në një spital që merret vetëm me trajtimin e pacientëve me COVID-19.
Departamenti i provave klinike të sëmundjeve infektive ka qenë i përfshirë me prova klinike sa i përket aplikimit të një antivirali të spektrit të gjerë që po përdoret te pacientët e prekur nga COVID-19, Rezultatet kanë qenë pozitive. Vlen për tu përmendur që këto rezultate pozitive që janë nxjerrë paraprakisht, pasi nuk janë përfunduar ende, përputhen me ato të provave të tjera klinike që janë zhvilluar në vende të tjera të botës. Kështu që shpresojmë se do të ketë një përfundim pozitiv sa i përket aplikimit të këtij medikamenti si terapi përfundimtare të aprovuar nga administrata amerikane e ushqimit dhe medikamenteve”, tha ai.
