Gjermania ka lehtësuar disa nga masat e marra për shkak të pandemisë të shkaktuar nga COVID-19. Nëpërmjet një njoftimi të Ministrisë së Jashtme gjermane janë bërë të ditura rregullat e reja të lëvizjes drejt shtetit Gjerman të cilat do të aplikohet për të gjithë shqiptarët që do të udhëtojnë drejt këtij vendi.

Sipas udhëzimit të ri, të gjithë udhëtarët që mbërrijnë në Berlin në rrugë ajrore, tokësore apo detare, nga një shtet jashtë Republikës Federale të Gjermanisë, janë të detyruar që menjëherë pasi kanë hyrë në Gjermani të vete-izolohen në banesën e tyre për një periudhë prej 14 ditësh pas kthimit të tyre.

Gjithashtu, këtyre personave që sapo janë karantinuar nuk u lejohet të kenë vizitorë, përveç personave që jetojnë në të njëjtën banesë.

Kjo masë vlen edhe për personat që hyjnë për herë të parë nga një vend tjetër në Republikën Federale të Gjermanisë.

Çdo person që hyn në Gjermani gjatë kësaj periudhe është i detyruar të kontaktoj menjëherë autoritetin përgjegjës shëndetësor, të cilët kontrollojnë nëse kërkesat e karantinimit janë përmbushur, si dhe t’i njoftojnë ata nëse kanë simptoma të ndryshme të infektimit.

Gjatë periudhës së karantinës, të gjithë personat janë subjekt vëzhgimi nga departamenti i shëndetësisë.