Mjeku shqiptar në Kanada, Erion Musabelliu, teksa flet për situatën e krijuar nga Covid-19, tregon se në këtë vend po zhvillohen disa teste për medikamente që mund të ndihmojnë në kurimin e virusit. Mjeku vlerëson masat e marra nga qeveria kanadeze dhe thekson rëndësinë e distancimit social për të fituar betejën me koronavirusin.
“Lidhur me ecurinë e virusit, diskutimet janë duke u mbledhur dhe mendohet se do të jetë një virus sezonal. Sipas studimeve të bëra mendohet se ky virus është përhapur edhe para nëntorit të vitit të kaluar nga kafshët tek njerëzit. Imuniteti ndaj këtij virusi ekziston por këto antitrupa nuk mund ta mbrojnë plotësisht njeriun sepse virusi sa herë shumohet krijon mutacione. Pra trupi duhet të krijojë antitrupa të tjerë, dhe kjo është arsyeja që mendohet se virusi do të jetë sezonal”, shprehet Musabelliu.
Gjithashtu ai ka theksuar se shkenca duhet të bëjë përpjekje më të mëdha që të zbulojë më shumë. Anti malariku por edhe kombinimet e tjera nuk kanë dhënë rezultatet që duhej deri tani dhe prandaj duhet punë për zbulimin e një vaksine të re. Sipas mjekut pritshmëritë për vaksinën janë të mëdha dhe se disa kompani të mëdha farmaceutike janë duke punuar shumë për këtë gjë.
