Ledian Memushaj është i detyruar t’i nënshtrohet një ndërhyrje kirurgjikale në gju për të shmangur dhimbjet që ishin kthyer në kronike. Mesfushori pati probleme edhe në ndeshjet me kombëtaren e para sfidës me San Marinon edhe pse ishte projektuar titullar, në fund nuk ia doli të zbriste në fushë.

Kështu, vlonjati ka vendosur t’i japë fund dhimbjeve dhe do të mbyllë para kohe sezonin pasi koha e rikuperimit shkon deri në katër muaj.

Në këtë formë, sezoni aktual për Memushaj mund të konsiderohet tërësisht i pafat duke qenë se edhe më herët lojtari ishte dëmtuar ndërsa më pas erdhi COVID që gjithashtu e mbajti gjatë larg fushës së blertë.

Memushaj luan aktualisht në Itali me Delfino Pescara dhe është lojtar i kombëtares shqiptare.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.