Në praninë e rreth njëqind anëtarëve të saj, Shoqata e Bashkësisë Shqiptaro- Kanadeze në Toronto organizoi kuvendin e saj të rregullt zgjedhor. Mbledhja u nda në dy pjesë; e para e prezantimeve të cilën e udhëhoqi Alfred Hasimaj dhe të dytën, atë zgjedhore të cilën e udhëhoqi Saimir Lolja.
Në fillim kryetari në largim z. Bujar Zejnullahu tregoi në mënyrë të organizuar të gjitha aktivitetet në mandatin e tij katërvjeçar, ku nuk kaloi pa përmendur edhe aktivitetet e jashtëzakonshme të shoqatës gjatë pandemisë COVID-19, ku shoqata kishte gjetur megjithatë mënyra të tjera të organizimit të saj.
Midis pandemisë kishte marrë nismën për porositjen dhe shpërndarjen e disa maskave me motive kombëtare shqiptare, të cilat do t’i dhuroheshin falas bizneseve esenciale shqiptare që operojnë në Toronto. Maskat me ngjyra të kuqe dhe të kaltra ishin punuar nga stilistja shqiptare Tatjana Kaci- Sherifaj.
Z. Zejnullahu përmendi se gjatë mandatit të tij shoqata ka shënuar edhe 30- vjetorin e themelimit. “Personalisht ndihem i privilegjuar dhe krenar që kam qenë pjesë dhe vazhdoj të kontribuoj vullnetarisht në një shoqatë kulturore dhe kombëtare me historinë më të vjetër në Kanada. Jam mirënjohës për të gjithë themeluesit, drejtuesit, anëtarët e bordit ndër vite, dhe mbështetësit e vazhdueshëm të saj nga themelimi e deri me sot.”- tha z. Zejnullahi.
Ai më tutje përmendi edhe bashkëpunimin e vazhdueshëm që ka patur me udhëheqësit e kaluar të kësaj shoqate ku theksoi se në Këshillin e Nderit të shoqatës, disa prej të cilëve ishin të pranishëm në kuvend si Murat Hashani, Roland Lelaj, Saimir Lolja, etj. Ai me krenari përmendi se komunikimi me shumicën e ish-drejtuesve dhe anëtarëve të bordit është aktiv.
Raportin e financave për delegatët e pranishëm e paraqiti financieri Rex Rexhepi, ku u përqendrua tek të ardhurat e anëtarësimeve, sponsorëve, si dhe harxhimet thelbësore të shoqatës gjatë këtij mandati.
Në pjesën e dytë u mbajtën zgjedhjet ku anëtarët e përgjithshëm zgjodhën të trembëdhjetë anëtarët e rinj të bordit: Irene Breznica, Amarda Selimi, Rex Ferati, Bruna Mersini, Emiljana Zenelaj, Oriana Naska, Perparim Kapllani, Anisa Arra, Elbunit Bugacku, Nora Marku, Lindita Kalo, Flora Selmani dhe Eranda Zoga.
Në një mbledhje të shkurtër me vetëm një rend dite, pra zgjedhjen e kryetarit, anëtarët vendosën në mënyrë unanime për të zgjedhur kryetare Irena Breznicën, një aktiviste dhe anëtare e bordit të shoqatës prej shume vitesh.
Në deklaratën e parë të saj si kryetare, znj. Breznica falënderoi të pranishmit dhe kryesinë e re për besimin e dhënë duke theksuar se ka qenë e përfshirë me komunitetin shqiptar që si fëmijë.
Irena Breznica njihet si aktiviste e palodhshme, e cila ka qenë e lidhur me komunitetin shqiptar në Toronto që fëmijë.
Në një intervistë të saj të mëparshme dhënë gazetës “Diaspora Shqiptare” ajo ndër të tjera thekson: “Unë shkoja në shkollën shqipe në Toronto dhe recitoja poezi në aktivitete të ndryshme të komunitetit tonë. Pastaj isha pjesë e një grupi vallëzimi, i cili në rininë time gjithashtu interpretonte nëpër aktivitete të këtij komuniteti. Në disa raste, kam kryer edhe punën e konferencieres në gjuhën shqipe e angleze. Siç e thashë burri im gjithashtu më inkurajoi që të bashkohesha në kryesinë e SHBSHK të Torontos, ku tashmë po bëhen rreth tetë vite aktivizim, ndërsa në mandatin e fundit jam zgjedhur edhe nënkryetare, punë të cilën e kryej me kënaqësinë më të madhe. Besoj se edhe në të ardhmen do ta japë kontributin tim në ruajtjen e kulturës dhe traditës shqiptare në Kanada”.
Në mbledhjen e ardhshme të kryesisë do të zgjidhen edhe krerët tjerë të shoqatës, si nënkryetari, sekretari, arkëtari dhe financieri.
