Një grup gazetarësh dhe producentësh televizivë nga Gjermania vizituan qytetin e Gjirokastrës. Ata e kanë përfshirë qytetin e gurtë, në turin njohës që po zhvillojnë në vendin tonë, për promovimin e turizmit shqiptar.

Në Gjirokastër ata u pritën nga ministrja e Turizmit, Mirela Kumbaro dhe kryetari i bashkisë Flamur Golemi.

“Ne mbështetëm vizitën tuaj në Shqipëri dhe organizimin e këtij turi njohës me vlerat, resurset, monumentet e kulturës dhe zonat turistike që ofron vendin ynë për vizitorët e huaj”, u shpreh ministrja Mirela Kumbaro.

Sipas saj, tashmë të gjitha strukturat shtetërore po mbështetin gjithmonë e më shumë zhvillimin e sektorit turizmit, si një promotor i rëndësishëm i ekonomisë kombëtare.

“Në Gjirokastër kemi zbatuar dhe po vazhdojmë të punojmë me projekte të rëndësishme, për rijetësimin e vlerave të trashëgimisë kulturore dhe vendosjen e tyre në shërbim të zhvillimit të turizmit”, pohoi ministrja e Turizmit, Mirela Kumbaro.

Për kryetarin e bashkisë Gjirokastër, Flamur Golemi, vizita e grupit të gazetarëve dhe producentëve gjermanë është e rëndësishme. “Dekada e re që ka nisur flet për Shqipërinë si një destinacion i pashmangshëm turistik. Vetë Gjirokastra është një atraksion më vete që tërheq nga viti në vit më shumë turistë edhe prej Gjermanisë. Jam i bindur se edhe kjo vizitë e tyre, që do të shoqërohet me raportime apo shkrime mbi impresionet që patën në qytetin e gurtë, është një kontribut i shtuar për të rritur interesin e vizitorëve gjermanë për Gjirokastrën”, u shpreh kryebashkiaku Golemi.

Grupi i gazetarëve dhe producentëve nga Gjermania do të vizitojnë qendrat e rëndësishme turistike në vendin tonë, me synim promovimin e tyre në median ndërkombëtare.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.