Temperatura mjaft të larta janë regjistruar në Greqi për shkak të valës së të nxehtit, ku në disa zona termometri ka shënuar dhe 47 gradë Celsius.

Vala e nxehtë që ka goditur gjithë vendin, akoma dhe zonat malore që nga fundjava pritet të zgjatë gjatë gjithë kësaj jave, duke arritur temperatura rekord të 40 viteve të fundit, theksojnë mateorologët grekë.

Fenomeni tepër i rrezikshëm ka shkaktuar shqetësim të lartë, qeveria greke është në gatishmëri të aktivizimit të situatës së jashtëzakonshme, ndërsa për sot dhe deri të enjten ka udhëzim të posaçëm për ndalimin e punës nga punëtorë që janë të ekspozuar në ambjente të jashtme, si në sektorin publik ashtu dhe privat, duke u fokusuar kryesisht në orarin 12.00-16.00.

Në gatishmëri edhe Zjarrëfikësit, pas alarmit të meteorologëve për kushte favorizuese të zjarreve masive. Ditët e fundit Greqia ka patur mbi 50 vatra zjarri si në pjesën kontinentale ashtu dhe në ishujt e vendit.

Banorët dhe turistët e vendit kanë pushtuar plazhet, në kërkim të freskisë, ndërsa në qendrën turistike të Athinës shkrin asfalti nga orët e para të ditës. Moti i nxehtë pritet të bëjë një “pushim” të vogël në fundjavën e ardhshme, duke u rikthyer sërish nga java tjetër, por pa të njëjtin intensitet.

Sakaq, Ministria e Energjitikës së vendit bën thirrje për përdorim të kujdesshëm të pajisjeve elektronike, kursim të energjisë dhe jo shpërdorim, për të shmangur blackout.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.