Shoqata e Komunitetit Shqiptar në Hania ka ndërmarrë një nismë për punësim sezonal  të shtetasve shqiptarë.

Iniciativa e Shoqatës erdhi pas mungesës së madhe të punëtorëve. Këta të fundit nuk mund të udhëtojnë drejt Greqisë siç ndodhte në të kaluarën, për shkak të situatës së krijuar nga koronavirusi.

Në bashkëpunim me agjencitë e punësimit Shoqata e Komunitetit Shqiptar në Hania po përpiqet të sjell punëtorë që ofruan shërbimin e tyre gjatë verës nga vende të ndryshme të shtetit helen për t’u angazhuar 2-3 muaj në mbledhjen e ullinjve.

“Jemi në kontakt të vazhdueshëm me agjencitë e punësimit në Athinë dhe në qytete të tjera. Fermerët mund t’u drejtohen zyrave tona çdo ditë në orarin 07:00-17:00 ose të aplikojnë nëpërmjet faqes tonë në facebook për numrin e punëtorëve që kanë nevojë dhe vendndodhjen. Bëhet fjalë për punëtorë të huaj të cilët kanë punuar gjatë sezonit të verës në Greqi dhe që aktualisht kërkojnë punë” tha kreu i Shoqatës së Komunitetit Shqiptar në Hania, Afrim Avdiaj.

“Krahë pune nga Shqipëria për mbjelljen e ullirit “-  është titulli i artikullit të botuar sot në gazetën lokale të Haniasë mbi këtë marrëveshje.

Agjensitë e punësimit në Athinë dhe qytete të tjera kanë shumë kërkesa kryesisht  nga çifte të cilët dëshirojnë të punojnë në Kretë gjatë sezonit të  ullirit. Punëtorët janë nga Shqipëria, Gjeorgjia, Nepali, Indonezia, Bangladeshi dhe vendet Afrikane. Dita e punës paguhet rreth 23 euro  (afro 700 euro në muaj) ndërsa kërkohet dhe sigurimi i strehimit për periudhën e qëndrimit të tyre.