Gazeta australiane “Star Journal” ka shkruar mbi aktin mbrojtës të z. Jim Memeti, kryebashkiakut shqiptar të qytetit Dandeneong të Australisë, me anë të blerjes dhe marrjes në pronësi publike të një parku të kërcënuar nga ndërtimet.
Oferta e këshillit doli fitues edhe pse kishte shumë oferta për pronën që ishte e familjes McQuade që nga viti 1936.
Parku është 4830 metër katror dhe i ka kushtuar bashkisë plot 2.625 milion dollarë.
Kryetari i bashkisë Jim Memeti dhe këshilltari Peter Brown, të cilët të dy vëzhguan ankandin, u emocionuan që toka do të qëndrojë në përdorimin e publikut. Blerja e saj siguroi që parku nuk do të përdorej për ndërtesa shumë katëshe.
“Ne kurrë nuk do të shohim diçka të tillë përsëri në qendër të Dandenong. Ne do të mundohemi që ta bëjmë funksional sa më shpejt të jetë e mundur”, tha Memeti.
Këshilltari Peter Brown shtoi se oferta ishte shumë më e lartë seç normalisht kushtonte parku.
Disa nga ofertuesit kishin bërë madje edhe kërkesë për të parë mundësinë e heqjes së pemëve në rast se ata do të shpalleshin fitues.
Sa i përket emrit të parkut ai u shpreh se mund të quhet McQuade Park.
Jim Memeti është zgjedhur në postin e Kryebashkiakut të Greater Dandenong për të tretën herë përgjatë 12 viteve. Familja e z. Memeti emigroi në Australi gjatë fëmijërisë së tij të hershme.
