Këshilli i Ministrave ka vendosur sot në mbledhjen e radhës për krijimin e një regjistri publik për të gjithë studentët me orgjinë shqiptare që studiojnë jashtë shtetit.

Në VKM e propozuar nga ministri i Shtetit për Diasporën përcaktohen elementët që do të përfshihen në këtë regjistër. Kështu çdo studenti do t’i publikohen përveç gjeneraliteteve dhe të dhëna të tjera si periudha e studimeve, shteti pritës, institucioni i arsimit të lartë pranë të cilit studion, fusha e studimeve, burimi i financimit të bursës, emaili etj.

Ky regjistër do të përfshijë si shtetasit shqiptarë, të cilët kryejnë studimet e arsimit të lartë jashtë vendit,  shtetasit e huaj me origjinë shqiptare, të cilët janë përfitues të programeve të financuara nga Republika e Shqipërisë si dhe shtetasit shqiptarë, të cilët kanë përfituar bursat e studimit të cilat i ofrohen Shqipërisë nga shtete, organizata ndërkombëtare dhe jofitimprurëse në bazë të marrëveshjeve të nënshkruara apo dokumente të tjera ku Republika e Shqipërisë është palë.

Baza e të dhënave shtetërore e studentëve, të cilët studiojnë jashtë vendit, dhe shtetasve të huaj me origjinë shqiptare, të cilët përfitojnë bursa studimi nga Republika e Shqipërisë, ndërvepron me Regjistrin Kombëtar të Gjendjes Civile (DPGjC) dhe database-t e tjera shtetërore, të cilat, në aktin e krijimit të tyre, parashikojnë ndërveprimin me bazën e të dhënave shtetërore të studentëve, të cilët studiojnë jashtë vendit, dhe shtetasve të huaj me origjinë shqiptare, të cilët përfitojnë bursa studimi nga Republika e Shqipërisë.

Sipas vendimit të Këshillit të Ministrave, institucioni administrues i të gjithë procesit deri në krijimin e regjistrit do të jetë Agjencia Kombëtare e Diasporës dhe buxheti i nevojshëm do të përballohet nga Ministria për Diasporën.