Klaus Gjasula është emri që ka surprizuar më tepër tifozët e Kombëtares në ndeshjet e drejtuara nga trajneri Edoardo Reja. Në një intervistë për “Player on Focus”, titullari dhe mesfushori i skuadrës Paderborn në Gjermani rrëfen hapat e parë në karrierë, si dhe  emocionet e përjetuara në ndeshjen e parë në Bundesligë. Më tej, Gjasula nuk ngurron të përshkruajë emocionet e përftuara nga fanella kuqezi.

“Ne kemi pasur një fushë futbolli prapa pallatit dhe takoheshim aty në lagje. Një ditë më tha një shok nëse doja që të shkoja me të në një klub futbolli që kishte nisur ai. Kam shkuar me të dhe kështu e nisa këtë rrugëtim”, tregon fillimisht  Klaus Gjasula.

“Ndeshja e parë “e vërtetë” që kisha ishte në Bundesligë 2. Ishte një gjë e madhe për mua, pasi e kisha pritur gjatë dhe ishte si ëndërr. Më e bukura ishte që shënova një gol dhe fituam 2-0”, vijon futbollisti teksa ndalet tek ftesa e marrë nga Kombëtarja për të luajtur për vendlindjen.

“Për një futbollist nuk ka gjë më të madhe se të luajë për gjakun dhe vendin e tij. Për këtë arsye ka qenë një endërr e realizuar kur më erdhi ftesa. Nuk ka gjë më të bukur se të luash me shqiponjën te gjoksi. Tani jam afruar edhe më tepër me Shqipërinë, ndërsa Kombëtarja më ka ndihmuar pasi vij më shpesh aty”, shprehet Gjasula.

“Vlerësimi më motivon shumë dhe sa herë që ikja nga Shqipëria dhe shkoja në Gjermani për të bërë stërvitjen me klubin, mezi i prisja ditët që të bëja sërish rrugën dhe të grumbullohesha me Shqipërinë”, përfundon ai.