Festivali më i madh në botë i Filmit të Emigracionit do të realizohet për të pestin vit radhazi në Greqi dhe fton kineastët nga e gjithë bota të marrin pjesë.
Ndryshe nga herët e tjera, festivali do të shfaqë filmat on line. Organizatorët njoftojnë se edhe diskutimet, intervistat me kineastët dhe ekspertët e emigracionit, në një kohë kur kërkohet distancimi social, do të zhvillohen on line.
Dorëzimi i filmave tashmë ka filluar dhe do të zgjasë deri më 21 qershor 2020. Vetëm filmat e paraqitur përmes platformës zyrtare të Festivalit të Filmit do të merren në konsideratë.
Fituesit do të zgjidhen nga një juri e trajnuar posaçërisht; nga profesionistë të filmit, akademikë dhe ekspertë të njohur ndërkombëtarisht të emigracionit.
Në edicionet e mëparshme të festivalit janë projektuar edhe filma nga artistë shqiptarë si: “I am Rohingya” dhe “Zvicra” nga Fisnik Maxhuni, filmi “Kiem Holijanda”, etj.
Filmat e përzgjedhur për t’u shfaqur në këtë festival trajtojnë aspekte të ndryshme të migrimit, nga kthimi i detyruar me forcë, migrantët në lëvizje, deri te çështjet e integrimit dhe identitetit kur jetojnë në Diasporë. Nëpërmjet tyre, tregimet personale rrëfejnë një aspekt njerëzor të migrimit, përtej vellos të paragjykimit, dhe numrave të depersonalizuar.
Që nga viti 2016, Organizata Ndërkombëtare për Migracionin (IOM) organizon Festivalin Global të Filmit mbi Migracionin (GMFF – Global Migration Film Festival) në mbarë botën, duke shfaqur filma dhe dokumentarë që shfaqin sfidat e migrimit dhe kontributet unike që emigrantët i dhurojnë komuniteteve të tyre të reja.
Festivali i këtij viti do të shfaqet në më shumë se 100 vende, duke përfshirë shfaqjen e IOM-ut në Kosovë. Qëllimi i GMFF është që të përdorin filmin si mjet edukativ me të cilët ndikojnë në pikëpamjet dhe qëndrimet ndaj migrantëve, si dhe mjet kreativ për normalizimin e diskutimeve mbi migrimin nëpërmjet tregimit.
Festivali Ndërkombëtar i Filmit të Emigracionit (GMFF) është unik në llojin e tij, pasi është i vetmi konkurs i filmit që zhvillohet njëkohësisht në gjashtë kontinente.
