Ministria e Financave ka publikuar së fundmi planin vjetor të pagesës së taksave muajve në vazhdim, ku efektin më të dukshëm do të japin në gjysmën e dytë të vitit. Duke qenë se në shtator fillon edhe procesi i fiskalizimi, MFE parashikon që rrjedhimisht të rritet edhe niveli i të ardhurave. Konkretisht në plan përcaktohet se, në gjashtëmujorin e parë janë programuar të vilen rreth 240 miliardë lekë të ardhura tatimore, ndërsa në 6-mujorin e dytë do të grumbullohen 269 miliardë lekë.
Barra fiskale vjen e rritet pas muajit korrik deri në dhjetor ku bizneset dhe individët do të paguajnë 44-45 miliardë taksa në muaj në raport me 35 -43 miliardë lekë për muaj që paguajnë në gjysmën e parë të vitit.
Të ardhurat tatimore që mblidhen nga administrata tatimore dhe ajo doganore në vitin 2020 programohet të jenë 334 miliardë lekë, me rritje +6,42 %. Ndërsa të ardhurat nga kontributet e sigurimeve shoqërore dhe shëndetësore parashikohen të jenë 103 miliardë lekë, +4,8 %, ose 4,7 miliardë lekë krahasuar me pritshmërinë e vitit 2019. Plani i grumbullimit të të ardhurave sipas muajve është bërë në bazë të intensitetit të aktivitetit ekonomik në vend.
Në përmbajtjen e raportit evidentohet se, faktorët e jashtëm të marrë në konsideratë janë: rritja nominale e PBB e skontuar me Koeficientin e Elasticitetit, është aplikuar duke analizuar këtë efekt në mënyrë të integruar me faktorë të tjerë për çdo taksë në veçanti, të ndërlidhur me projeksionet e çmimeve në tregjeve ndërkombëtare tek TVSH, renta minerare dhe taksa doganore, sipas financave.
Efekti i fiskalizimit
Zbatimi i procesit të fiskalizimit parashikohet si lëvizja më pozitive dhe me kontributin më të madh në buxhetin e shtetit për këtë vit. Sipas Ministrisë së Financave fiskalizimi do të krijojë qëndrueshmëri dhe rritje afatgjatë ekonomike. “Programimi i të ardhurave për vitin 2020, mbështet synimet e Ministrisë së Financave dhe Ekonomisë për konsolidim fiskal, reduktim të deficitit buxhetor dhe borxhit publik. Programi bazohet në përmirësimin e administrimit fiskal nëpërmjet implementimit të projektit të fiskalizimit, dhe minimizimin e informalitetit në ekonomi, duke mbështetur në këtë mënyrë rritjen ekonomike të qëndrueshme, nëpërmjet nxitjes së prodhimit dhe eksporteve”, shprehet MFE.
Burimi origjinal këtu.
