Komisioni Qendror i Zgjedhjeve (KQZ) ka shpërndarë një njoftim të rëndësishëm për të gjithë qytetarët shqiptarë që banojnë jashtë vendit dhe janë regjistruar për të votuar në zgjedhjet e ardhshme përmes Platformës së Regjistrimit Elektronik (PER).

Sipas KQZ-së, të gjithë ata votues që gjatë regjistrimit në sistem kanë deklaruar vetëm një adresë e-maili, do të marrin njoftimin për dërgimin e zarfit me votën nëpërmjet shërbimit postar DHL, pikërisht në këtë adresë elektronike. Autoritetet u bëjnë thirrje votuesve të kontrollojnë rregullisht kutinë e postës elektronike, përfshirë edhe dosjet “Spam” apo “Promotions”, për të mos humbur asnjë njoftim të rëndësishëm.

KQZ thekson se në rastet kur kompania DHL nuk arrin të dorëzojë zarfin, për shkak të një adrese të pasaktë, të paplotë apo të pambërritshme, atëherë vetë DHL do të dërgojë një njoftim dhe udhëzime për tërheqjen e zarfit, përmes mesazhit në telefonin e deklaruar apo përmes emailit.

“Ju ftojmë të ndiqni çdo komunikim zyrtar për të siguruar marrjen dhe kthimin në kohë të zarfit me votën nga jashtë,” thuhet në njoftimin zyrtar të KQZ-së.

Ky proces është pjesë e përpjekjeve për të garantuar përfshirjen e votuesve shqiptarë që jetojnë jashtë vendit në vendimmarrjen demokratike të vendit, përmes një mënyre të sigurt dhe të monitoruar të votimit.

Autoritetet zgjedhore vijojnë të theksojnë rëndësinë e përgjegjësisë qytetare dhe pjesëmarrjes aktive të çdo shqiptari në këtë proces që përcakton të ardhmen e përbashkët të vendit.

Gjithashtu KQZ kujton votuesit se për pyetje apo pasiguri, mund të kontaktoni lehtësisht përmes mënyrave të mëposhtme:

Telefononi me pagesë: +355 4500535 (nga ora 08:00 deri në 24:00, me orën lokale të Shqipërisë)

WhatsApp: Dërgoni një mesazh tekst në +355 694086567

Rezervoni një komunikim telefonik: https://kqz.gov.al/rezervo/