Qeveria italiane ka shprehur vendosmërinë për të mos pezulluar marrëveshjet me Shqipërinë për trajtimin e emigrantëve, duke përgatitur një dekret të ri për të kaluar kompetencat e qendrave pritëse në Gjadër dhe Shëngjin në juridiksionin e Tiranës. Ky veprim është ndërmarrë për të shmangur qëndrimin e emigrantëve në kampe bosh, si dhe për të parandaluar refuzimin e vendimeve të Gjykatës së Romës.
Ministri për Çështjet e BE-së, Tommaso Foti, konfirmoi se qeveria po shqyrton mundësinë e miratimit të një dekreti të ri ligjor përpara vendimit të Gjykatës Evropiane të Drejtësisë, që pritet të mbledhë më 25 shkurt. Pas tre refuzimeve të ndalimeve të emigrantëve nga gjyqtarët e Emigracionit dhe Gjykatës së Apelit, autoritetet italiane po mendojnë që menaxhimi i qendrave të bëhet nga Tirana dhe jo më nga Roma.
Opozita italiane ka reaguar kundër këtyre propozimeve, duke i cilësuar ato si “djallëzore”, duke theksuar se qeveria po krijon përplasje institucionale dhe po shpërdoron burimet e shtetit. Ata kanë kërkuar ndalimin e kësaj praktike dhe kërkimin e faljes për shpenzimet që lidhen me qendrat e emigrantëve.
Megjithatë, nisma e qeverisë nuk pritet të diskutohet menjëherë, por mbetet një ide që po qarkullon në qeverinë Meloni. Vendimi i Gjykatës së Apelit të Romës ka bërë që 43 emigrantët e vendosur në kampin e Gjadrit të kthehen sërish në Itali, ku kërkesat e tyre për azil do të shqyrtohen.



