Komisioneri Shtetëror i Zgjedhjeve, Ilirjan Celibashi, ka sqaruar sot se Komisioni Qendror i Zgjedhjeve (KQZ) nuk ofron dhe nuk ka ofruar asnjë lloj ndihme apo mbështetje për regjistrimin e votuesve në terren.

Në një postim në rrjetet sociale, Celibashi theksoi se e vetmja ndihmë zyrtare për votuesit nga jashtë ofrohet vetëm nga Qendra e Ndihmës pranë KQZ-së, përmes kanaleve të komunikimit të miratuara, duke përfshirë:

✅ Thirrjet telefonike
✅ Mesazhet në WhatsApp
✅ Chatbot-in
✅ Email-in zyrtar të KQZ-së

Sipas Celibashit, procesi i regjistrimit të votuesve nga jashtë kryhet ekskluzivisht përmes Platformës Elektronike të Regjistrimit (PER), e cila është e aksesueshme në www.kqz.gov.al ose përmes aplikacionit zyrtar të KQZ-së për telefonat smart.

🔹 Asnjë person i paautorizuar nuk mund të angazhohet në regjistrimin e votuesve nga jashtë
Celibashi bëri thirrje që çdo qytetar të denoncojë rastet kur persona të ndryshëm prezantohen si përfaqësues të KQZ-së jashtë ambienteve zyrtare. “KQZ nuk ka autorizuar asnjë individ tjetër që të angazhohet në procesin e regjistrimit në emër të institucionit. Kushdo që përballet me një rast të tillë, duhet ta raportojë menjëherë pranë organit të prokurorisë,” theksoi ai.

🔹 Regjistrimi i votuesve nga jashtë mbrohet me standarde të BE-së
Përtej kësaj, Celibashi siguroi se procesi i regjistrimit është i sigurt dhe në përputhje me të gjitha standardet e sigurisë të Bashkimit Europian, duke garantuar mbrojtje nga çdo ndikim politik apo partiak.

“KQZ nuk ka autorizuar askënd që të ndërhyjë në këtë proces, as brenda vendit dhe aq më pak jashtë tij,” përfundoi ai.