Seanca e parë parlamentare për vitin 2025 ka nisur sot me fjalën e kryetares së Kuvendit, Elisa Spiropali, e cila theksoi rëndësinë e votës për Diasporën, duke e cilësuar atë si një nga arritjet më të mëdha të Kuvendit të Shqipërisë. Ajo nënvizoi se ky është një hap i rëndësishëm në përmirësimin e legjislacionit zgjedhor, duke mundësuar që shqiptarët jashtë vendit të kenë mundësinë të votojnë për Kuvendin nga vendet pritëse.

Spiropali filloi fjalimin e saj duke kujtuar se sot hapet sesioni i tetë i Kuvendit, si dhe sesioni i fundit i legjislaturës aktuale. Ajo theksoi se nesër, më 21 janar, shënohet Dita e Themelimit të Parlamentarizmit Shqiptar, një datë historike që u kujtua me nderime për Kongresin e Lushnjës, i cili nisi konsolidimin e Shqipërisë së pavarur dhe parlamentare.

Kryetarja e Kuvendit vuri theksin në rëndësinë e ndryshimeve në legjislacionin zgjedhor dhe arritjen që mundësoi votën e Diasporës, duke falënderuar të katër grupet parlamentare dhe deputetët për angazhimin në këto reforma. Ajo theksoi se këto ndryshime janë një përgjigje e natyrshme për nevojën e konsolidimit të demokracisë shqiptare.

Spiropali gjithashtu përmendi se Shqipëria ka pasur një nga flukset më të larta të emigracionit që nga fillimi i viteve ’90, duke përmendur kontributin e madh të emigrantëve shqiptarë në vendet fqinje dhe ato të Bashkimit Evropian, si dhe në SHBA, Kanada dhe Australi. Ajo i cilësoi ata si qytetarë të denjshëm dhe vlerësoi punën e palodhur të tyre për zhvillimin e vendeve ku jetojnë.

“Janë qytetarë, mjaft prej tyre edhe shtetas të denjshëm,” përfundoi fjalimin e saj kryetarja Spiropali.