Nga Valentin Vuçaj
Një protestë paqësore civile u mbajt sot, më 21 nëntor, në orën 11:00, pranë Europe House në Londër, ku pjesëmarrësit shprehën pakënaqësinë e tyre lidhur me përdorimin e këngës “Oj Kosovë, Kosovë” gjatë një aktiviteti të Forumit të Zgjerimit të Bashkimit Evropian në Bruksel.
Protesta u zhvillua në 32 Smith Square, pranë selisë së përfaqësimit të Bashkimit Evropian në Londër, nën moton “Kërkojmë përgjegjësi, llogaridhënie dhe respekt për Kosovën”.
Sipas organizatorëve, tubimi erdhi pas reagimeve të shkaktuara nga interpretimi i këngës “Oj Kosovë, Kosovë” në kuadër të aktivitetit në Bruksel, një veprim të cilin ata e konsiderojnë të papërshtatshëm dhe të ndjeshëm për shkak të historisë së Kosovës dhe viktimave të luftës.
Në njoftimin e protestës, organizatorët deklaruan se kjo çështje, sipas tyre, nuk mund të trajtohet thjesht si një gabim protokollar, pasi prek “plagët e kujtesës historike, dinjitetin kombëtar dhe ndjenjat e mijëra familjeve që kanë vuajtur pasojat e luftës në Kosovë”.
Organizatorët rikujtuan gjithashtu pasojat e luftës në Kosovë, duke iu referuar rreth një milion shqiptarëve të dëbuar me forcë nga shtëpitë e tyre, rreth 13,500 personave të vrarë, mijëra grave të dhunuara gjatë luftës dhe rreth 1,600 personave që vazhdojnë të konsiderohen të zhdukur.
Pjesëmarrësit në protestë kërkuan nga Bashkimi Evropian një hetim të plotë dhe sqarime të detajuara lidhur me atë që ka ndodhur gjatë aktivitetit në Bruksel.
Ndër kërkesat e paraqitura nga organizatorët ishte edhe kërkesa për përgjegjësi institucionale nga personat që ata konsiderojnë përgjegjës për organizimin e aktivitetit, si dhe një kërkimfalje publike ndaj popullit dhe shtetit të Kosovës.
Në listën e kërkesave përfshihej gjithashtu që, në proceset e zgjerimit të Bashkimit Evropian, të merren parasysh dhe të respektohen të drejtat dhe meritat e Kosovës.
Organizatorët kërkuan po ashtu që institucionet evropiane të tregojnë kujdes ndaj promovimit të politikave apo figurave politike që, sipas tyre, bien në kundërshtim me vlerat mbi të cilat është ndërtuar Bashkimi Evropian.
“Dinjiteti i viktimave nuk është çështje protokolli. Kujtesa historike nuk është çështje kompromisi”, thuhej në thirrjen për protestën.
Përmes tubimit, organizatorët thanë se synojnë të kërkojnë transparencë, përgjegjësi institucionale dhe respekt ndaj historisë së Kosovës dhe viktimave të luftës.
Në njoftimin e tyre ata theksuan gjithashtu orientimin pro-evropian të shqiptarëve, duke deklaruar se protesta nuk ishte organizuar kundër vlerave evropiane, por pikërisht në emër të respektimit të tyre.
Sipas tyre, drejtësia, dinjiteti dhe kujtesa historike duhet të mbeten pjesë e rëndësishme e marrëdhënieve të Kosovës me institucionet evropiane.
Protesta e sotme në Londër u zhvillua në mënyrë paqësore, ndërsa pjesëmarrësit kërkuan që shqetësimet e tyre të dëgjohen nga institucionet e Bashkimit Evropian dhe që rasti të marrë një përgjigje zyrtare.
Tubimi përfundoi me mesazhin se kujtesa për viktimat e luftës së Kosovës dhe respekti ndaj sakrificës së tyre duhet të mbeten të panegociueshme, pavarësisht zhvillimeve politike apo diplomatike.









