“Bolero në vilën e pleqve”: një histori dashurie mes heshtjes, vetmisë dhe kujtesës
Në konkurrimin zyrtar të Festivalit të Filmit Shqiptar në kategorinë Filmi i Gjatë i Karrierës
është edhe “Bolero në vilën e pleqve”, filmi i regjisorit Spartak Pecani. Një histori që e vendos dashurinë dhe vetminë në qendër të një marrëdhënieje mes dy brezave dhe dy mënyrave të ndryshme për ta parë jetën.
Në qendër të filmit është Irena, një infermiere e re që jeton në një qytezë të vogël. Marrëdhënia intime me shoqen e saj, Anën, e vendos përballë një realiteti ku frika dhe paragjykimi e detyrojnë të largohet. Ajo mbërrin në Tiranë, ku nis punë duke u kujdesur për një çift të moshuarish.
E vetmuar dhe pa një drejtim të qartë për jetën e saj, Irena gjen në vilën e çiftit një hapësirë ku ndihet më pak e huaj. Aty bëhet dëshmitare e marrëdhënies së dy të moshuarve dhe e një letërkëmbimi të pazakontë, të shoqëruar nga tingujt e “Boleros”.
Gradualisht, historia e çiftit bëhet për Irenën një mënyrë për të parë nga afër një dashuri që i ka rezistuar kohës. Përballë saj qëndron bota e fëmijëve të tyre, të cilët, ndryshe nga prindërit, duket se e kanë humbur orientimin për atë që kërkojnë nga jeta dhe marrëdhëniet.
Përplasja mes këtyre dy botëve e ndryshon edhe mënyrën se si Irena e sheh veten. Në një film ku vetmia shfaqet në forma të ndryshme, dashuria e çiftit të moshuar bëhet për të një pikë referimi dhe një zbulim mbi vlerën e lidhjes njerëzore.
“Bolero në vilën e pleqve” e ndërton rrëfimin përmes marrëdhënieve mes personazheve dhe përmes kontrastit mes një dashurie të konsoliduar nga vitet dhe pasigurive të një brezi që ende kërkon vendin e vet.
Spartak Pecani, një karrierë e gjatë në regji
Spartak Pecani është regjisor shqiptar me një karrierë të gjatë në kinematografi, televizion dhe dokumentar. Ai studioi aktrim dhe regji në Universitetin e Tiranës në vitet 1970–1972, përpara se të vijonte studimet e larta për regji filmi në universitetin I.A.T.C. në Bukuresht, Rumani, nga viti 1972 deri në vitin 1976.
Pas përfundimit të studimeve, Pecani ndërtoi një galeri filmash të gjerë, duke realizuar 16 filma me metrazh të gjatë, krahas dokumentarëve, filmave të shkurtër dhe serialeve televizive. Në filmografinë e tij përfshihen “Streha e re”, “Ne vinim nga lufta”, “Një gjeneral kapet rob”, “Si gjithë të tjerët”, “Kohë e largët”, “Të mos heshtësh”, “Treni niset në 7 pa 5”, “Vetmi”, “Shirat e vjeshtës”, “Ah, këto thashethemet”, “Përdhunuesit”, “Sekretet”, “ADA” dhe, së fundmi, “Bolero në vilën e pleqve”.
Krahas regjisë, Pecani ka punuar edhe si producent, duke qenë pjesë e realizimit të shtatë filmave me metrazh të gjatë të regjisorëve të tjerë, si dhe të dokumentarëve, filmave të shkurtër dhe të animuar.
“Bolero në vilën e pleqve” është ndër veprat e tij më të vlerësuara në festivalet ndërkombëtare. Filmi është përzgjedhur në Rome Independent Film Festival, Eurovision Palermo Film Festival, Prishtina International Film Festival, Balkan Panorama Film Festival, Switzerland International Film Festival dhe FIFOG në Gjenevë.
Në nivel çmimesh, filmi është vlerësuar me Çmimin për Skenarin më të Mirë të një Filmi të Huaj me Metrazh të Gjatë në Fusion International Film Festival në Varshavë, Filmi më i Mirë me Metrazh të Gjatë në Paris Play International Film Festival, ndërsa Pecani mori çmimin Regjisori më i Mirë në International Filmmaker Festival of New York. Skenaristja e filmit u vlerësua gjithashtu me çmimin për Skenarin më të Mirë në Toronto International Women Film Festival.
Pecani është vlerësuar edhe si bashkëskenarist i “Lëkura e qenit”, skenar që ka marrë gjashtë çmime në festivale ndërkombëtare, përfshirë vlerësime për skenarin në Ukrainë, Los Angeles, Suedi, Chicago dhe në festivale të pavarura të kinemasë.
Me “Bolero në vilën e pleqve”, Spartak Pecani rikthehet te një histori ku marrëdhëniet njerëzore janë në qendër të rrëfimit, duke e parë dashurinë jo vetëm si ndjenjë, por edhe si një formë qëndrueshmërie përballë vetmisë, kohës dhe ndryshimit.
SKEDA TEKNIKE
Filmi: Bolero ne vilen e pleqve
Regjisor: Spartak Pecani
Producent: Agim Halili
Aktorë: Robert Ndrenika, Margarita Xhepa
Aktor mbështetës: Afrim Mucaj, Gentiana Ramadani, Olta Gixhari
Skenarist: Lindita Fejzaj, Spartak Pecani
Kineast: Latif Hasolli
Kompozitor: Endri Sina
Montazhi: Redi Treni
Inxhinier zëri: Alban Osmaj
Dizajner e kostumeve: Gerta Oparaku
Kohëzgjatja: 95 min
Gjuha: Shqip



