Diamant Hysenaj, 42 vjeç, një investitor republikan i pasurive të paluajtshme dhe emigrant nga Kosova, njoftoi kandidaturën e tij për të sfiduar deputeten progresiste dhe socialiste demokratike Alexandria Ocasio-Cortez në Distriktin e 14-të të Kongresit Amerikan, që përfshin pjesë të Bronx-it dhe Queens-it në Nju Jork.
Në një intervistë për The New York Post, Hysenaj theksoi se përvoja e tij jetësore – nga fëmijëria në një fermë në Kosovë, përmes luftës dhe shpërbërjes së Jugosllavisë, deri tek ndërtimi i një biznesi të suksesshëm në Amerikë – e ka përgatitur për këtë sfidë politike.
“Isha një fëmijë i vogël që u transferova në Bronx, në një lagje të vështirë, ku u përpoqa të përshtatesha dhe punova fort për të arritur ëndrrën amerikane: biznes të suksesshëm, familje të bukur dhe një thirrje për të shërbyer komunitetin,” tha Hysenaj.
Ai theksoi se historia e tij përputhet me atë të shumë emigrantëve në këtë zonë, duke u identifikuar si një zë për ata që kërkojnë mundësi dhe përmirësim në një komunitet të ndryshëm dhe sfidues.
Megjithëse sfida ndaj një figure të njohur si Alexandria Ocasio-Cortez konsiderohet e vështirë, Hysenaj beson se përvoja e tij unike dhe rruga e gjatë e përpjekjeve mund ta ndihmojnë të fitojë besimin e zgjedhësve në këtë distrikt me shumicë emigrantësh dhe ëndërrimtarësh.
Kandidatura e tij sjell në fokus një perspektivë të ndryshme brenda Partisë Republikane, duke u përpjekur të ndërtojë urat me komunitetin shqiptar dhe emigrantët e tjerë në Nju Jork.



