Më 11 korrik 2025, artisti me origjinë shqiptare, Erjon Hajnaj, do të hapë ekspozitën e tij personale me titull “My Light & Shadow” në Sullivan Family Gallery në BAYarts, Bay Village, Ohio. Ceremonia e hapjes do të mbahet nga ora 17:00 deri në 20:00, me pjesëmarrjen e publikut dhe të ftuarve të veçantë. Në këtë ngjarje do të shërbehen ushqime dhe pije, ndërsa veprat e përzgjedhura do të prezantohen gjithashtu në Sotheby’s New York gjatë verës së vitit 2026.

Ekspozita sjell një përzgjedhje veprash që ndërthurin dritën dhe hijen si elementë simbolikë të kërkimit të së vërtetës dhe identitetit personal. Përmes një gjuhe artistike që përfshin satirën, alegorinë dhe absurditetin, Hajnaj përdor teknikat e mjeshtërve të Rilindjes dhe Barokut, duke përfshirë chiaroscuro-n, për të eksploruar tensionin emocional dhe filozofik të përvojës njerëzore.

“Për mua, errësira është pika më e sinqertë e nisjes. Është aty ku ndriçimi i fokusuar nuk ofron domosdoshmërisht një të vërtetë të plotë, por një moment kalimtar ndriçimi – një përpjekje për të kuptuar veten dhe botën,” shprehet Hajnaj në deklaratën e tij artistike.

Erjon Hajnaj, i lindur në Fier më 1977, e nisi rrugëtimin artistik që në moshë të re, i frymëzuar nga xhaxhai i tij, Kujtim Komprencka, një skulptor i njohur me qasje klasike. Ai u arsimua në shkollën e artit “Jakov Xoxa” në Fier, duke ndjekur trashëgiminë familjare në skulpturë. Për shkak të krizës politike dhe ekonomike në fund të viteve ’90, Hajnaj emigroi në SHBA më 1997. Aty përfundoi studimet për pikturë në Cleveland Institute of Art dhe ndërtoi një karrierë të suksesshme si piktor, me vepra të ekspozuara në galeri vendase dhe ndërkombëtare.

Përmes ekspozitës “My Light & Shadow”, Hajnaj fton vizitorët në një reflektim të thellë mbi perceptimin, identitetin dhe natyrën subjektive të së vërtetës, duke ofruar një përvojë që shkon përtej vizuales drejt emocioneve dhe mendimeve më intime njerëzore.

Më shumë mbi artistin dhe veprat e tij: www.erjonhajnaj.com