Levian Goga, emigranti nga Berati që u hodh pa hezitim në ujërat e ftohta të lumit Arakhtos për të shpëtuar dy fëmijë të mitur nga mbytja, po trajtohet në Spitalin e Arta-s pas problemeve me frymëmarrjen dhe gëlltitje të forta që ka shfaqur në ditët e fundit.
Burime pranë spitalit bëjnë të ditur se Levian ka pasur një kollë të fortë dje dhe është paraqitur fillimisht tek një mjek privat, i cili e këshilloi të kryente analiza të specializuara. Pas konsultës mjekësore, Ministri i Shëndetësisë, Adonis Georgiadis, reagoi menjëherë duke urdhëruar që një ambulancë e shërbimit EKA ta transferonte menjëherë në spital për ekzaminime të mëtejshme.
Mjekët konfirmojnë se gjendja e tij është e qëndrueshme dhe nuk ka rrezik për jetën. “Po i nënshtrohet ekzaminimeve të detajuara, por fatmirësisht nuk kemi shqetësime serioze,” deklaruan burime spitalore.
Shpërblim për një akt guximi të jashtëzakonshëm
Për veprimin e tij heroik, autoritetet greke kanë njoftuar se Goga Levian do të shpërblehet me shtetësinë greke nderi, një vendim që është përshëndetur gjerësisht nga opinioni publik.
Por kush është “Leo i fshatit”, siç e thërrasin banorët e Neohorit në Arta?
Levian Goga ka shkuar nga Berati në Greqi 24 vite më parë, kur ishte vetëm 17 vjeç. Si shumë bashkëkombës të tij, ai emigroi i vetëm dhe pa shumë mjete, duke ndjekur rrugën e vështirë të një jete të ndërtuar nga e para. Fillimisht jetoi në Athinë, ku punoi në kushte të vështira, por gjithnjë me dinjitet dhe pa u dorëzuar.
Sot, ai jeton në Arta me bashkëshorten dhe dy fëmijët e tij të mitur, të moshave 10 dhe 6 vjeç. Jeta e tyre ishte e qetë, deri në ditën kur gjithçka ndryshoi.
“Ai fëmijë ishte në moshën e vajzës sime”
Ditën e ngjarjes, Goga ndodhej në një kafene kur një djalë i ri mbërriti me motor, duke thirrur me dëshpërim për ndihmë – dy fëmijë po mbyteshin në lumë. Ai nuk mendoi dy herë. Hipi në makinën e tij, shkoi me nxitim në vendngjarje dhe pasi u fut nëpër vegjetacion, bashkë me disa persona të tjerë hipi në një varkë dhe kërkoi fëmijët në ujë.
Pas dy tentativash pa sukses, në përpjekjen e tretë ai arriti të gjejë një nga fëmijët – të palëvizshëm, me fytyrë të nxirë nga mungesa e oksigjenit. E nxori në breg dhe më pas mësoi se edhe fëmija tjetër ishte shpëtuar.
“Ai fëmijë ishte në moshën e vajzës sime. Nuk kishte rëndësi kush ishin, çfarë feje apo kombësie. Unë jam i huaj, por jam njeri. Bëra atë që do të bënte çdo baba,” ka deklaruar ai me një zë të dridhur për mediat.
Një njeri i zakonshëm me një zemër të jashtëzakonshme
“Leo” siç e thërrasin me dashuri fqinjët, nuk është shpëtimtar profesionist dhe nuk kërkon vëmendje apo lavdi. Ai nuk priste as falënderime. “Fëmijët. Vetëm ata mendoj,” ishin fjalët e para që tha pas shpëtimit.
Ky akt trimërie ka frymëzuar të gjithë komunitetin lokal dhe më gjerë, duke rikujtuar se heronjtë shpesh fshihen mes nesh, në jetën e përditshme, duke jetuar me dinjitet dhe duke vepruar me guxim kur jeta e të tjerëve është në rrezik.
Goga Levian është tashmë një simbol i humanizmit dhe solidaritetit, jo vetëm për komunitetin shqiptar në Greqi, por për të gjithë ata që besojnë në forcën e njeriut të zakonshëm që bën gjëra të jashtëzakonshme.
