Komisioneri Shtetëror i Zgjedhjeve, Ilirjan Celibashi, ka kërkuar sqarime urgjente nga kompania ndërkombëtare e shpërndarjes postare DHL, pas akuzave publike për parregullsi në shpërndarjen e fletëve të votimit në Greqi.

Reagimi i institucionit të administrimit zgjedhor vjen menjëherë pas pretendimeve të Partisë Demokratike Aleanca për Shqipërinë Madhështore, e cila akuzoi publikisht për manipulime dhe vonesa të qëllimshme në dorëzimin e materialeve zgjedhore për shqiptarët e regjistruar si votues në shtetin fqinj.

Në një letër zyrtare drejtuar DHL-së, Celibashi i drejton një sërë pyetjesh të detajuara që kërkojnë të shpjegojnë mekanizmat dhe personelin e përfshirë në këtë proces, si dhe të sqarojnë nëse kompania ka deleguar ndonjë pjesë të operacionit ndonjë pale të tretë. Gjithashtu, KQZ kërkon të dijë për numrin e zgjedhësve që nuk kanë marrë fare njoftim për dërgesën, përse kjo ka ndodhur, dhe nëse ekziston dokumentacion provues për dorëzimin personal të materialeve.

“Për shkak të rëndësisë dhe urgjencës së këtij procesi, kërkojmë që informacioni i mësipërm të na vihet në dispozicion brenda një afati sa më të shkurtër,” theksohet në letrën zyrtare të Celibashit.

Nëse konfirmohen parregullsitë e raportuara, kjo mund të vendosë në diskutim integritetin e një prej elementeve më të rinj dhe simbolikisht më të rëndësishëm të zgjedhjeve shqiptare — përfshirjen e diasporës në vendimmarrjen politike përmes votës postare. Rreth 120 mijë shqiptarë të regjistruar jashtë vendit kanë pasur mundësinë të votojnë për herë të parë, një proces i ndërtuar mbi premtimin e transparencës dhe përfaqësimit të drejtë.

Nga ana tjetër, Partia Demokratike ka kërkuar që fletët e votimit që mbërrijnë nga Greqia të mos bashkohen me ato të ardhura nga vendet e tjera, por të trajtohen veçmas, duke ngritur kështu edhe më tej tonet politike për një proces që tashmë po kalon përmes një testimi të vështirë të besueshmërisë së tij.

DHL, ndërkohë, nuk ka dhënë ende një reagim publik mbi këtë kërkesë. Të gjitha palët janë në pritje të një përgjigjeje që mund të ndikojë jo vetëm mbi legjitimitetin e votës së diasporës, por edhe në klimën politike të vendit për javët në vijim.