Komisioni Qendror i Zgjedhjeve ka nisur një operacion të gjerë informimi për qytetarët e regjistruar si votues nga jashtë, të cilët banojnë në Greqi, ndërsa përgatitjet për zgjedhjet parlamentare të 11 majit po hyjnë në fazën përfundimtare.
Sipas njoftimeve zyrtare, shqiptarët me të drejtë vote që kanë deklaruar adresat e tyre në Greqi duhet të kenë marrë tashmë një mesazh ose email nga kompania e shërbimeve postare DHL, ku jepen udhëzimet për dorëzimin e zarfit të votimit. Zarfi do të dërgohet në adresën e regjistruar të votuesit; në mungesë të pranisë në banesë, materiali zgjedhor do të depozitohet në pikën më të afërt të shërbimit të DHL.
Për të përballuar fluksin, shpërndarja e zarfeve do të vazhdojë edhe gjatë fundjavës, më 26 dhe 27 prill, me orare të zgjatura pune. Shumica e pikave të DHL në Athinë, përfshirë ato në rrugët Patision, Filellinon dhe Alimos, si edhe në Pire, Glifada dhe Nea Smyrni, do të jenë të hapura nga ora 09:00 deri në 15:00. Shërbime të ngjashme do të ofrohen edhe në qytete të tjera si Selanik, Larisa, Patra, Iraklio dhe Hania.
Nëse votuesit kanë marrë një njoftim, por ende nuk kanë pranuar zarfin, autoritetet u kërkojnë të kontaktojnë sa më shpejt DHL-në përmes numrit të qendrës së thirrjeve (+30 210 989 0000), duke përdorur numrin e identifikimit të dërgesës (“αριθμός φορτωτικής”), ose të lidhin kontakt me pikën lokale që u është komunikuar me SMS.
Votuesit kanë gjithashtu mundësinë të kërkojnë që zarfi i votimit të tërhiqet nga banesa e tyre, ose ta dorëzojnë personalisht në një nga pikat e shërbimit të DHL. Autoritetet këshillojnë qytetarët të ndjekin statusin e dërgesës përmes platformës zyrtare të gjurmimit të DHL: www.dhlexpress.gr/en/tracking.html.
Shpërndarja në kohë e zarfeve konsiderohet kyçe për garantimin e pjesëmarrjes së diasporës në këtë proces zgjedhor historik.
Rruga Patision (Qendra e qytetit): 09:00 – 15:00Rruga Filellinon (Qendra e qytetit): 09:00 – 15:00Pire: 09:00 – 15:00Rruga Alimos: 09:00 – 15:00Glifada: 09:00 – 15:00Nea Smyrni: 09:00 – 15:00Selanik (Rruga Vasilissis Olgas): 09:00 – 15:00Selanik (Rruga Polytechniou): 09:00 – 15:00Larisa: 09:00 – 15:00Patra (Rruga Agiou Andrea): 09:00 – 15:00Iraklio: 09:00 – 15:00Hania: 09:00 – 15:00