Kombëtarja shqiptare ka siguruar një fitore të pastër 3-0 ndaj Andorrës në “Arena Kombëtare”, në ndeshjen e dytë të eliminatoreve të Kupës së Botës 2026.

Kuqezinjtë e drejtuar nga trajneri Silvinjo shfaqën superioritet të plotë që në minutat e para, duke vendosur diktatin e lojës me një qarkullim të shpejtë të topit dhe raste të shumta në portën kundërshtare.

Shqipëria kaloi në avantazh që në minutën e 9-të, kur Rey Manaj shfrytëzoi një asist të shkëlqyer nga Kristjan Asllani dhe me një goditje të saktë me kokë e dërgoi topin në rrjetë.

Sulmuesi shkodran nuk u ndal me kaq dhe në minutën e 19-të dyfishoi rezultatin, pas një aksioni të ndërtuar nga Armando Broja, i cili pas një driblimi të shkathët në zonë shërbeu për Manajn, që nuk gaboi përballë portierit kundërshtar.

Në pjesën e dytë, kuqezinjtë ulën disi ritmin, duke menaxhuar avantazhin e dyfishtë. Megjithatë, goli i tretë erdhi në minutat shtesë, kur Myrto Uzuni përfitoi nga një kros në zonë dhe e dërgoi topin në rrjetë, duke vulosur suksesin e Shqipërisë.

Me këtë fitore, Kombëtarja ngjitet në vendin e dytë në grupin K me 3 pikë, pas Anglisë, që kryeson me 6 pikë.

Formacionet zyrtare me të cilat luajtën skuadrat

Shqipëria: Strakosha; Balliu, Gjimshiti, Ajeti, Aliji; Shehu, Asllani, Laçi; Hoxha, Manaj, Broja.
Andorra: Alvarez; Borra, Garcia, Babot, Rosas, San Nicolas, Cervos, Rubio, Rebes, Marc Garcia, Olivera.