Kombëtarja shqiptare e futbollit po vijon përgatitjet intensive për dy sfidat e para të kualifikuesve të Kupës së Botës, kundër Anglisë dhe Andorrës. Dy nga lojtarët kyç të skuadrës, Kristjan Asllani dhe Nedim Bajrami, folën sot në konferencën për shtyp të mbajtur në “Shtëpinë e Futbollit”, duke shprehur besimin dhe përkushtimin e tyre për këto ndeshje vendimtare.
Asllani: “Nuk shkojmë si turistë, do të luftojmë për rezultat pozitiv”
Mesfushori i Interit, Kristjan Asllani, u shpreh se atmosfera në kampin kuqezi është shumë e mirë dhe ekipi po punon fort për të qenë në formë maksimale. Ai theksoi se ndeshja kundër Anglisë do të jetë një sprovë e vështirë, por skuadra nuk do të dorëzohet pa luftuar.
“Janë një ekip fizik dhe teknik, por nuk duhet të mendojmë shumë. Duhet të luajmë me shpirt e zemër dhe të mos shkojmë atje si turistë. Në fushë hyjmë gjithmonë për fitore,” u shpreh Asllani.
Lidhur me tifozerinë kuqezi, ai u bëri thirrje tifozëve që të mbështesin ekipin, sidomos për ndeshjen kundër Andorrës që do të zhvillohet në “Arenën Kombëtare”.
Bajrami: “Anglia është sfidë e madhe, por jemi gati”
Nga ana e tij, Nedim Bajrami theksoi se ai dhe ekipi janë plotësisht të fokusuar dhe do të japin maksimumin për të dalë me rezultat pozitiv. Mesfushori i Rangers-it u shpreh i gatshëm të kontribuojë në çdo pozicion ku trajneri Silvinjo do ta vendosë.
“E dimë se sa cilësore është Anglia, por duhet të fokusohemi te vetja dhe të luajmë si ekip. Të gjithë lojtarët janë gati dhe do të ndjekim udhëzimet e trajnerit për ta përballuar kundërshtarin në mënyrën më të mirë të mundshme,” tha Bajrami.
Ai kujtoi gjithashtu suksesin e tij kundër Mourinhos dhe Fenerbahçes në Europa League, duke e cilësuar atë si një motivim shtesë për sfidat me Kombëtaren.
Synimi: Kualifikimi në Kupën e Botës
Me rikthimin e Armando Brojës dhe përkushtimin maksimal të skuadrës, kuqezinjtë synojnë të bëjnë një hap të rëndësishëm drejt kualifikimit në Kupën e Botës. Ndeshjet kundër Anglisë dhe Andorrës do të jenë një test serioz për skuadrën, që do të përpiqet të përfitojë maksimumin nga këto sfida.
Tashmë mbetet për të parë sesi do të reagojnë djemtë kuqezi në fushë dhe a do të arrijnë të marrin një rezultat historik kundër një kundërshtari të nivelit më të lartë si Anglia.
