Java Globale e Parasë për vitin 2025 ka nisur këtë të hënë në Tiranë nën sloganin “Ndiq me mençuri, begati në ardhmëri”. Ky vit ka një fokus të veçantë në mbrojtjen nga keqbërësit dhe vjedhja e llogarive online, një fenomen që po rritet paralelisht me zhvillimin e shpejtë të teknologjisë.
Një pyetje e njohur që ka shqetësuar breza të tërë është: “Më mirë të dish apo të kesh?” Kjo duket si një lojë fjalësh, por disa nga njerëzit më të pasur në botën kapitaliste, si Warren Buffett, Jeff Bezos, Mark Zuckerberg dhe Larry Ellison, kanë dhënë përgjigje të qarta. “Investimi më i mirë që mund të bëni është në veten tuaj… Sa më shumë të mësoni, aq më shumë do të fitoni” – një filozofi që është bërë emëruesi i përbashkët i miliarderëve globalë. Shqipëria, gjithashtu, po përpiqet të bëhet pjesë e hartës globale të popullatave të “edukuara financiarisht”.
Në kuadër të kësaj jave, e organizuar nga OECD-INFE, fokus është edukimi i fëmijëve dhe të rinjve për zhvillimin e një mendësie financiare të shëndoshë. Tema e këtij viti, “Think before you follow, wise money tomorrow”, është një thirrje për reflektim dhe një qasje më të kritikuar ndaj burimeve të informacionit financiar. Ky apel është i rëndësishëm, duke pasur parasysh ndikimin e madh të rrjeteve sociale dhe teknologjisë në vendimmarrjen financiare të të rinjve.
Përveç mundësive që ofron kapitalizmi, ky sistem ka edhe rreziqet e tij, ku mashtrimi është një nga kërcënimet kryesore. Një aspekt thelbësor i edukatës financiare është aftësia për të dalluar informacionin e besueshëm nga ai të rremë, pasi historitë e humbjeve të mëdha financiare nga mashtrimet janë të shumta.
Në një fjalim, guvernatori i Bankës së Shqipërisë, Gent Sejko, theksoi rëndësinë e edukimit financiar dhe nevojën për më shumë përpjekje për të zhvilluar njohuritë financiare. “Njohuritë që do të fitoni sot mund të jenë themeli i sigurisë dhe suksesit tuaj nesër. E ardhmja financiare e Shqipërisë fillon me vendimet që marrim sot, dhe ju, të rinjtë, jeni protagonistët kryesorë të saj”, tha ai.
Si pjesë e iniciativës për të promovuar edukimin financiar, nga viti i ardhshëm mësimor, është parashikuar që ky lëndë të përfshihet edhe në arsimin fillor të shkollave të vendit.
