Në ambientet historike të Kishës St Marylebone në Londër, Ambasada e Republikës së Kosovës organizoi një pritje diplomatike me rastin e 17-vjetorit të Pavarësisë së Kosovës.

Në këtë event solemn morën pjesë përfaqësues të trupit diplomatik të akredituar në Mbretërinë e Bashkuar, përfaqësues të Oborrit Mbretëror, anëtarë të ‘House of Lords’ dhe ‘House of Commons’, si dhe bashkatdhetarë nga Mbretëria e Bashkuar.

Ceremonia nisi me tingujt e violinës të artistit Kastriot Gjon Marku i cili interpretoi të dy Himnet Kombëtare.

Ambasadori i Republikës së Kosovës në Mbretërinë e Bashkuar, Sh.T.Z. Ilir Kapiti, mbajti fjalën e hapjes, duke theksuar rëndësinë e kësaj date historike për Kosovën dhe përkushtimin e institucioneve për forcimin e marrëdhënieve me Mbretërinë e Bashkuar. Ai gjithashtu përkujtoi figurat kyçe të luftës dhe përpjekjeve për liri, duke nënvizuar rrugën e gjatë të Kosovës drejt pavarësisë.

Në vijim të ceremonisë, fjalën e mori Alistair Harrison CMG CVO, Marshal of the Diplomatic Corps, i cili vlerësoi progresin e Kosovës dhe rolin e saj në skenën ndërkombëtare.

Një moment kulmor i mbrëmjes ishte interpretimi i artistes së njohur Rona Nishliu, e cila solli një repertor të pasur me këngë shqiptare, duke i dhënë një dimension të veçantë artistik eventit. Ndër performancat, u kujtua edhe legjenda e muzikës shqiptare, Nexhmije Pagarusha.

Në ceremoninë e organizuar nga Ambasada e Kosovës ishte i pranishëm edhe Ambasadori i Republikës së Shqipërisë në Mbretërinë e Bashkuar, Sh.T.Z. Uran Ferizi, duke reflektuar frymën e unitetit dhe bashkëpunimit mes dy shteteve shqiptare.

Mbrëmja u mbyll me një koktej rrethuar nga biseda miqësore mes përfaqësuesve diplomatikë, bashkatdhetarëve dhe miqve britanikë të Kosovës, duke shënuar kështu një tjetër moment të rëndësishëm të diplomacisë kosovare në Londër.