Kryetari i Partisë Demokratike, Sali Berisha, zhvilloi një takim me komunitetin shqiptar që jeton e punon në Itali, ku iu drejtua atyre me një apel për të marrë pjesë në zgjedhjet e 11 majit. Ai theksoi se këto zgjedhje janë vendimtare për të ardhmen e Shqipërisë, duke e cilësuar si një moment të rëndësishëm për të mbrojtur ekzistencën e kombit shqiptar.

Berisha i bëri thirrje të gjithë shqiptarëve të angazhohen për të votuar, duke i ftuar të ngrihen kundër qeverisë aktuale që, sipas tij, po shkatërron interesat e Shqipërisë. “Sot, çdo shqiptar që e ndjen veten patriot duhet të ngrihet kundër këtij qeveritari që po shkatërron farën tonë, kombin tonë,” tha Berisha.

Kreu i PD-së e përshkroi udhëtimin e diasporës si një rrugëtim të mbushur me dhimbje dhe sakrifica, ku emigrantët shqiptarë kanë lënë pas gjithçka për një jetë më të mirë. Ai theksoi se shqiptarët jashtë vendit janë frymëzim për arritjet në fushat e ndryshme të jetës, ndërkohë që u bëri apel atyre për të mbështetur Shqipërinë në një moment të vështirë, kur rreziqet janë të jashtëzakonshme.

Berisha kritikoi ashpër qeverinë e kryeministrit Edi Rama dhe e akuzoi për shpërnguljen e një pjese të madhe të shqiptarëve në drejtim të vendeve të BE-së. Ai theksoi se nëse Rama fiton një mandat të katërt, Shqipëria do të përballet me katastrofë, duke u shndërruar në një tokë të kriminelëve dhe trafikantëve. “Në një mandat tjetër, Shqipëria nuk do ekzistojë,” paralajmëroi Berisha.

Në fjalën e tij, Berisha gjithashtu theksoi rrezikun e ekstremizmit të majtë për Shqipërinë dhe përpjekjet për të lënë vendin pa opozitë. Ai bëri një përshkrim të periudhës kur Shqipëria ishte pa opozitë dhe e cilësoi atë si “natën më të keqe të një kombi.”

Në fund, Berisha premtoi ulje të taksave për emigrantët që do të kthehen në Shqipëri dhe të kontribuojnë për zhvillimin e vendit. Ai u shpreh se do të ofronte një periudhë 5-vjeçare pa taksa për ata që rikthehen dhe investojnë, duke i inkurajuar ata të vazhdojnë të ndërtojnë suksesin në Shqipëri, ashtu siç e kanë bërë në Itali. “5 vite zero taksa. I keni paguar ju taksat prej 20-30 vitesh me remitancat që keni dërguar në Shqipëri. Nuk ka taksa,” tha Berisha.