Në një periudhë kur Komisioni Qendror i Zgjedhjeve (KQZ) po përgatit rregulloret që do të mundësojnë votimin e emigrantëve në zgjedhjet e pranverës, Qeveria ka siguruar fondet e nevojshme për regjistrimin e tyre online. Top Channel raporton se në aktin normativ të buxhetit të shtetit për vitin 2024, i cili është dorëzuar për miratim në Kuvend, janë parashikuar 250 milionë lekë për ngritjen e një platforme elektronike që do të mundësojë këtë proces.
Sipas këtij akti normativ, mbështetja financiare ka për qëllim përgatitjen e procedurave të prokurimit për zgjedhjet e përgjithshme të vitit 2025, duke garantuar implementimin në kohë të sistemit të votimit për emigrantët. Grupi i punës në KQZ ka përfunduar hartimin e 20 akteve nënligjore, të cilat do t’i dërgohen për miratim Komisionit Rregullator. Afati i fundit për miratimin e rregulloreve është 10 shtatori, ndërsa regjistrimi i votuesve nga diaspora do të nisë katër muaj para zgjedhjeve dhe do të zgjasë 60 ditë.
Akti Normativ i Buxhetit të Shtetit:
“Propozimet sa i takon zërave të shpenzimeve buxhetore, ndër të tjera, konsistojnë në financimin shtesë, në masën 250 milionë lekë për vitin 2024, për projektin e regjistrimit të zgjedhësve në diasporë në Komisionin Qendror të Zgjedhjeve, me qëllim avancimin në vitin 2024 të procedurave të prokurimit për zgjedhjet e përgjithshme të vitit 2025 dhe garantimin e implementimit në kohë të sistemit”.
Grupi i punës i ngritur në Komisionin Qendror të Zgjedhjeve ka gati 20 aktet nënligjore, të cilat pritet ti dërgohen për miratim shume shpejt Komisionit Rregullator.
Në dokumentin që Top Channel disponon 10 shtatori përcaktohet si afati i fundit për miratimin e rregullave për regjistrimin e emigrantëve dhe përgatitjen e listës së zgjedhësve nga jashtë.
Deri në mes të nëntorit duhet të jetë marrë konsensusi për administrimin e numërimit dhe vlerësimit të votave që sipas parashikimeve në Kodin Elektoral pritet të bëhet në KQZ, ndërsa 1 Marsi i 2025-ës është limiti i afatit për miratimin e fletës së votimit e cila pritet tu shkojë përmes shërbimit postar emigrantëve të cilët kane shprehur dëshirën për të marrë pjesë në zgjedhjet e pranverës.
Regjistrimi i tyre do të hapet 4 muaj para datës së zgjedhjeve të dekretuar në Shqipëri dhe u lihet 60 dite kohë për ta përmbyllur këtë proces.
