Mes 100 kompanive të vlerësuara në Romë në garën e çmimeve Industria Felix është edhe një kompani shqiptare. Në aktivitetin e cili numëron edicionin e tij të 56-të, sipërmarrja Latel Srl e Lazim Amziut është vlerësuar si kompania më e mirë e huaj për performancën e menaxhimit dhe besueshmërinë financiare. Kjo është edhe hera e tretë që kompania Latel Srl vlerësohet me këtë çmim prestigjioz.
“Me krenari dhe kënaqësi edhe këtë vit, për të tretën herë radhazi, LATEL është renditur si ‘Kompania më e mirë në pronësi të huaj për performancën e menaxhimit dhe besueshmërinë financiare Cerved me selinë e saj në rajonin e Umbria’. Çmimi u nda dje, më 14 maj 2024, në Universitetin Luiss Guido Carli në Romë. Falënderoj të gjithë stafin tim, sepse falë tyre ne i arrijmë këto rezultate të shkëlqyera”, shkruan në facebook Lazim Amziu.
