Me 406 vota pro, 97 kundër dhe 94 abstenime, Parlamenti Evropian ka miratuar ndryshimin e rregullores për poseduesit e pasaportave serbe të lëshuara nga Drejtoria Koordinuese Serbe që banojnë në Kosovë, duke i përjashtuar ata nga kërkesat për viza.
Amendamenti i lejon BE-së të përjashtojë bartësit e këtyre pasaportave nga kërkesa për vizë kur kalojnë kufijtë e jashtëm të shteteve anëtare për qëndrime jo më shumë se 90 ditë në çdo periudhë 180-ditore, raporton EuropeanWesternBalkans.
Vendimi u miratua më parë nga Komiteti i Parlamentit Evropian për Liritë Civile, Drejtësinë dhe Çështjet e Brendshme.
Ajo ka marrë gjithashtu mbështetje nga Komiteti i Përfaqësuesve të Përhershëm të Shteteve Anëtare në Këshillin e BE-së.
Në fjalimin e tij në seancën plenare, raportuesi i Parlamentit Evropian për këtë raport Matjazh Nemec tha se Këshilli tashmë e ka miratuar vendimin dhe se Komisioni Evropian dhe Shërbimi Evropian për Veprim të Jashtëm e kanë mbështetur gjithashtu.
“Të nderuar kolegë, kjo nuk është çështje politike, por teknike. Kjo është vazhdimësi e liberalizimit të vizave që është miratuar për Serbinë në vitin 2009, për Kosovën që nga fillimi i këtij viti. Ky vendim ka të bëjë me përmirësimin e jetës së njerëzve”, tha Nemec.
Ai tha se vendimi është për rreth 18.000 banorë serbë të Kosovës që posedojnë pasaporta të lëshuara nga Drejtoria Koordinuese Serbe, të cilët janë kategoria e vetme e qytetarëve në Ballkanin Perëndimor që nuk gëzojnë regjim pa viza.
“Unë besoj se nuk ka asnjë justifikim për atë pozicion, politik apo tjetër. Në thelb është një çështje e trajtimit të barabartë dhe mosdiskriminimit”, tha Nemec.
Drejtoria Koordinuese Serbe lëshon pasaporta të Serbisë, por me vendbanime të Kosovës.
Theksojmë se Qeveria e Kosovës e ka kritikuar propozimin për përfshirjen e këtyre pasaportave në liberalizimin e vizave duke e quajtur si “shkelje e integritetit territorial të Kosovës”.
Qeveria e Kosovës ka argumentuar se me një vendim të tillë BE-ja do të ndikojë negativisht në procesin e integrimit të serbëve të Kosovës.
