Ditën e djeshme, në qytetin e Haniasë në Kretë, Lidhja e mësuesve shqiptarë në Greqi, në bashkëpunim me Komunitetin Shqiptar në Kretë, organizuan një aktivitet të veçantë titulluar “MËSUESES SIME” për të festuar ditën e mësuesit më 7 Mars.

Fëmijët e kurseve të mësimdhënies së gjuhës shqipe në ishullin e Kretës, së bashku me mësues, prindër dhe aktivistë të emigracionit, morën pjesë në këtë ngjarje të rëndësishme, ku pjesëmarrja ishte e lartë nëpër qytete si Palilhora, Kisamo, Kasteli, Tavroniti, Hania, Rethimno, Iraklio, dhe zonat përreth tyre.

Aktiviteti u drejtua nga nënkryetarja e Lidhjes së Mësuesve Shqiptarë në Greqi, Znj. Klarita Selmani. Nxënësit e kurseve shqip paraqitën një koncert me këngë, valle, dhe recitime të bukura për të pranishmit. Gjatë aktivitetit, u shkëmbyen mendime dhe përvoja pozitive mes mësuesve të gjuhës, duke theksuar nevojën për të konsoliduar kurset aktuale dhe për të hapur kurse të reja në qytete dhe zona ku mungon kjo mundësi. Mësuesit u nderuan me Certifikata të mirënjohjes nga Lidhja e Mësuesve Shqiptarë në Greqi, ndërsa kryetarët e komuniteteve ndanë përvojën e tyre në organizim dhe bashkëpunim për të siguruar suksesin e aktiviteteve të tyre. Në këtë ngjarje, merrte pjesë edhe Nën Kryetari i Komunitetit Shqiptar në Greqi dhe Koordinatori për Kretën dhe ishujt, Luan Pacani.