Me rastin e festave të 7-8 Marsit, Kursi i mësimit plotësues të gjuhës dhe kulturës Shqiptare “Frang Bardhi” në Rafina organizoi një aktivitet të veçantë artistik dhe kulturor për të nderuar mësuesit shqiptarë dhe ditën ndërkombëtare të gruas. Në këtë aktivitet, kryetarja e bashkisë së Rafinës, Znj. Dhimitra Tseva, përgëzoi iniciativën dhe nismën e Kursit “Frang Bardhi” për ruajtjen dhe promovimin e gjuhës dhe kulturës shqiptare. Fëmijët e kursit emocionuan të pranishmit me vjershat, recitimet dhe këngët e tyre të dedikuara mësuesve dhe nënave, duke sjellë një atmosferë të këndshme dhe festive. Gjithashtu, në këtë festë, Znj. Majlinda Rrapanj dhe Znj. Aferdita Basha, u bashkuan në valle tradicionale shqiptare së bashku me fëmijët dhe të pranishmit. Ky aktivitet ishte edhe një moment mirënjohje për të gjithë mësuesit shqiptarë dhe falënderim i veçantë për mësueset e mërgatës për kontributin e tyre të jashtëzakonshëm në ruajtjen e trashëgimisë kulturore dhe gjuhës amtare.
