Dita e  Pavarësisë së Kosovës,  kjo ditë e shënuar për mbarë Shqiptarinë është festuar me madhështi anembanë botës. Këshilli Koordinues i Diasporës ka ndjekur dhe është bërë pjesë e një sërë aktivitetesh mbresëlënëse festive.

Një prej aktiviteteve më domethënës ishte edhe iniciativa e anëtares Emina Cunmulaj në Florida, SHBA për sensibilizimin e mëtejshëm të opinionit publik ndërkombëtar e njëkohësisht edhe ndriçimin e anës së errët të luftës së egër për pavarësi të popullit kosovar.

Emina Cunmulaj ka organizuar me Fondacionin që drejton një panel me të ftuar nderi ish-presidenten e Kosovës, Atifete Jahjaga në një diskutim kushtuar dëshmive për përdorimin e dhunës seksuale si armë lufte, tmerrin e pasojat fatale që shkaktojnë këto akte monstruoze.

Emina Cunmulaj tha për gazetën e Diasporës se “Gjatë dialogut tonë, ne gjithashtu u referuam se si trupat e këtyre grave dhe burrave u shndërruan në fushëbetejë, si dhe traumën e fortë e të vazhdueshme të mbi 20,000 të mbijetuarve.

Diskutimi ynë bëri jehonë si një thirrje për veprim dhe drejtësi, duke kërkuar njohjen e rezistencës së jashtëzakonshme të shfaqur nga të mbijetuarit.

Ndërsa shohim përpara, jam e nderuar që Fondacioni i “Emina’s hand” (Dorës së Eminës) do të bashkëpunojë me Fondacionin Jahjaga, të palëkundur në angazhimin tonë për të fuqizuar të mbijetuarit dhe për të mbrojtur drejtësinë në skenën globale”.