Në këtë konkurs që realizohet për herë të parë nga Qendra e Studimeve dhe Publikimeve për Arbëreshët (QSPA) dhe ka në qendër komunitetet arbëreshe dhe rivitalizimin e arbërishtes, do të ketë një juri të përbërë prej pesë anëtarësh: Prof. Carmine Stamile (i ftuar nderi), znj. Fernanda Pugliese (e ftuar nderi), Prof. Diana Kastrati (Drejtoreshë Ekzekutive e QSPA) dhe dy studiuesit në fushën e letërsisë, Dr. Fabio Rocchi njëkohësisht ideator i këtij konkursi dhe Dr. Jolanda Lila.

Një profil i shkurtër i të ftuarve të nderit:

Prof. Carmine Stamile – Krijues i muzeut arbëresh të Qanës (Cerzeto) në Kalabri. Mbledhës i këngëve popullore ndër arbëreshë dhe autor i disa librave mbi këngët, traditat dhe kulturën arbëreshe. Gjithashtu, ai është autor i disa teksteve që kanë të bëjnë me mësimin e gjuhës arbëreshe në shkollat fillore, të cilat do të promovohen në Ditët e librit arbëresh në Tiranë. Ka botuar ese për mësimin e gjuhës arbëreshe dhe ka studiuar dhe botuar vepra të panjohura te F. A. Santorit.

Fernanda Pugliese vlerësuar së fundmi me titullin “Shqiponja e Artë”, jeton në Montecilfone. Profesoreshë e Letersisë, si dhe gazetare, historiane, eseiste dhe shkrimtare. Themeluese e Revistës Kamastra për Pakicat Gjuhësore të Molise-s dhe e shoqatës me të njëjtin emër e cila merret me planifikimin dhe menaxhimin e sporteleve gjuhësore të Molise-s, në zbatim të ligjit kombëtar 482 të vitit 1999. Themeluese e programit të lajmeve dygjuhëshe italisht – arbërisht, lajme që trasmetohen në kanalin e revistës online AmoliveNews.it. Ka kryer veprimtari trajnuese për punonjësit, ka mbikëqyrur botimin e fjalorit polinomial të të folmeve arbëreshe të Molise-s.