Për herë të parë 28 Nëntori festohet në mjediset e Parlamentit të Kanadasë nga përfaqësues të organizatave shqiptare të thirrur dhe organizuar nga Shoqata e Torontos (SHBSHK) dhe me koordinimin e Parlamentit të Kanadasë. Ky ishte edhe një rast për të falenderuar autorin e projekt-ligjit C-361, Yvan Baker, për shpalljen e nëntorit Muaji i Trashëgimisë Shqiptare në Kanada.
Nismëtarja e këtij ligji dhe lobuesja më e madhe e tij Dr. Ruki Kondaj rikujtoi se më 1 nëntor deputeti Yvan Baker, i mbështetur fuqishëm nga deputetja Julie Dabrusin paraqiti projektligjin në parlament.
“Një ligj që kalon në disa faza dhe nëse aprovohet së shpejti do të festojmë trashëgiminë shqiptare dhe kontributet e shqiptare në të gjithë Kanadanë . Shprehja e Yvan Baker në shqip “Jam Krenar që jam shqiptar” preku zemrat e shqiptarëve, e jo vetëm në Kanada po kudo në botë. Dhe të gjithë mediat lajmin e filluan po me këtë shprehje të tij. Ne jemi krenar që jemi shqiptar, por edhe më krenar kur kemi miq e dashamirës të fuqishëm si kanadez si Ivan Baker, Julie Dabrusin e shumë parlamentar të tjerë. U jemi mirënjohës edhe atyre që bënë të mundur ligjin e trashëgimisë në Ontario më 5 dhjetor 2016 si Laura Albanese, Yvan Baker dhe te tjerë. Një komb dallohet jo vetëm nga i njëjti gjak por edhe nga historia e përbashkët nga gjuha që flet, nga flamuri kombëtar si simbol i bashkimit si dhe nga pasuria e trashëgimisë kulturore shqiptare. Shqipëria ka një trashëgimi, shumë të pasur kulturore, materiale dhe shpirtërore. Ne shqiptarët ku që jemi mbartim me vete atë trashëgimi shpirtërore të trashëguar në breza si kodin e sjelljes të quajtur Besa shqiptare, mikpritjen, bashkëjetesën fetare të çmuar, këngët, vallet gjuhen tonë shqipe
Nga më të vjetrat në botë por edhe frymëzimin e njerëzve më të mëdhenj të të gjitha kohërave, si Gjergj Kastriot Skënderbeu, heroi ynë kombëtar, Shën Nënë Tereza e nderuar me çmimin Nobel”, tha ajo.
Gjatë aktivitetit deputetes Julie Dabrusin ju dhurua një medalje e realizuar nga gratë e mbijetuara nga abuzimet seksuale gjatë luftës në Kosovë. “Kjo është një ditë kur jo vetëm festojmë por përmendim edhe sakrificat, vuajtjet dhe mbijetesën e atyre që kaluan luftën”, u shpreh moderatorja e këtij aktiviteti Lyra Xhoci teksa dorëzoi vlerësimin.
