New York City: Organizata Grave Shqiptaro-Amerikane “Motrat Qiriazi” – AAWO, me një mbrëmje Gala, mbajtur të shtunën në lokalin luksoz në zemër të New York-ut, “Duomo 51”, shënoi 30- vjetorin e themelimit të saj.
Ndërsa, me këtë rast u ndanë dhe çmimet vjetore me të cilat u nderuan aktiviste të dalluara të komunitetit shqiptar, dhe disa nga themelueset dhe pionieret të cilat me punën e tyre në këtë organizatë, u tha se kanë kontribuar kaq shumë, dhe kanë ndihmuar kaq shumë gra dhe fëmijë, në komunitetin e shqiptarëve të Amerikës, dhe i janë bashkëngjitur komunitetit shqiptar në çdo veprimtari.
Me këtë rast në këtë mbrëmje të bukur festive në ditëlindjen e saj, shoqet, miq dhe të afërm të presidentes së kësaj organizate – përcollën dhe urimet me të bukura duke i dhuruar një tufë me lule të freskëta, udhëheqëses së kësaj organizate Presidentes së Organizatës së Grave Shqiptaro-Amerikane “Motrat Qiriazi”, Beti Beno Tsamblakos.
Me një kartolinë urimi në faqen e Fb-ut, ato shkruajtën : “Jemi krenarë për ju që keni bërë një ndryshim në komunitetin shqiptaro-amerikan duke fuqizuar gratë që të bëhen të suksesshme dhe duke ndihmuar fëmijët dhe familjet në nevojë! – Urime dhe shumë e shumë të tjera në vazhdim!”
Në këtë festë morën pjesë dhjetëra gra të gëzuara e të qeshuara, zonja e zonjusha të nderuara të komunitetit, përfshirë gratë e dy përfaqësive tona diplomatike në New York, Kosovës dhe Shqipërisë.
Ato festuan së bashku për disa orë në mjedisin e mrekullueshëm të lokalit “Duomo 51” në New York, ashtu si dinë të festojnë gjithmonë gratë shqiptare në Amerikë, me muzikë, këngë valle e melodi të përzgjedhuara nga DJ “Alban, nga të gjitha trevat.
Mbrëmja Gala e 30-vjetorit të Organizatës së Grave Shqiptaro-Amerikane “Motrat Qiriazi”, në moderimin e Enxhi Cuku, aktore dhe prezantuese televizive nga Shqipëria, me një performacë të shkëlqyer të Bariton Ergin Oda i “Oda Quartet” së bashku me kolegët e tij, përfshirë sopranon Dëshira Ahmeti – Kërliu, dhe pjesëmarrjen e disa artistëve të njohur të komunitetit, ishte një festë me të vërtet e bukur, festë që dhurojë veçse gëzim e krenari me simbolet tona kombëtare, flamurin e ngjyrat kuq e zi.
Mbrëmja Gala e 30-vjetorit të “AAWO Motrat Qiriazi”, u hap me fjalimet përshëndetëse nga Shqipe Biba, Fotin Allten, dhe më pas vazhdoi me ndarjen e çmimeve vjetore të kësaj organizate, si dhe të një urimi special me rastin e ditëlindjes drejtuar presidentes aktuale të AAWO “Mortat Qiriazi” Beti Beno, Esquire.
Aktorja e filmit “Aroma e trëndafilit të kuq” Enxhi Cuku, duke prezantuar fitueset e çmimeve “AAWO Awards”, çmim ky një kupë e qelqtë ku është skalitur medaljoni me emblemën e “Albanian American Woman’s Organization · AAWO “Motrat Qiriazi” the 30th Anniversary!, tha se “sonte po nderojmë disa nga themelueset dhe pionierët e kësaj organizate të mrekullueshme”, și : Dr. Anna Kohen, znj.Shqipe Biba, dhe Shqipe Malushi, Fotini Allteni, dhe Hane Selmani, Dr.Zana Dobroshi, Venera Bekteshi, Dr. Dolores Bushati, Dardanesha Andoni, Drita Shkurti, Loreta Stamo, Vjollca Jakupi, Sevina Cici, Ana Marku-Walsh, Elmira Muja, Liljana Gashi.
Presidentja e Organizatës së Grave Shqiptaro-Amerikane “Motrat Qiriazi”, Beti Beno Tsamblakos, në fillim të fjalës përshëndetëse tha, se jam thellësisht e nderuar të flasë para jush sot si Presidente e AAWO-së, duke festuar një moment historik të jashtëzakonshëm – 30-vjetorin e organizatës tonë.
Kjo mbrëmje, tha ajo është një dëshmi e udhëtimit të pabesueshëm që kemi nisur, kushtuar mbështetjes së grave dhe fëmijëve në nevojë brenda komunitetit tonë.
“Gjatë tre dekadave të fundit, AAWO ka qenë një fener shprese, qëndrueshmërie dhe fuqizimi. Ne kemi organizuar ngjarje të panumërta, ku secila prej tyre ka qenë një mundësi unike për të bërë një ndikim pozitiv. Nga kontributet, iniciativat edukative e deri te festimet kulturore, në komunitet , ne jemi përpjekur të krijojmë hapësirë ku Gratë Shqiptare Amerikane të gëzojnë dhe të kenë sukses. Përkushtimi ynë ndaj atyre njerëzve në nevojë ka qenë i palëkundur. Nëpërmjet programeve dhe nismave të shumta informuese, ne u kemi shtrirë dorën grave dhe fëmijëve, duke u ofruar atyre një shans për një të ardhme më të mirë. Historitë e tyre të qëndrueshmërisë dhe triumfit janë testament i punës së ndryshimit të jetës që ne bëjmë.” tha ajo.
Ndërsa, vijojë se “Kontributet kanë qenë në thelb të misionit tonë. Ne i kemi fuqizuar, frymëzuar dhe edukuar gratë shqiptare në Amerikë, duke i pajisur ato me aftësitë dhe njohuritë e nevojshme për të përballuar sfidat e jetës. Kemi organizuar seminare që kanë nxitur një ndjenjë të komunitetit, unitetit dhe forcës që përcakton AAWO. Por, udhëtimi ynë, tha ajo, është ende larg nga përfundimi i misionit tonë. Puna e rëndësishme që bëjmë vazhdon të përqendrohet, duke iu përshtatur nevojave në ndryshim të komunitetit tonë. Dhe, ndërsa festojmë përvjetorin tonë të 30-të, le ta shikojmë të ardhmen me shpresë dhe vendosmëri. Le të ri angazhohemi për kauzën, duke u siguruar që AAWO të mbetet një fener mbështetjeje dhe fuqizimi për brezat që do të vijnë.” u shpreh Presidentja e Organizatës së Grave Shqiptaro-Amerikane “Motrat Qiriazi”, Beti Beno Tsamblakos,
Dhe e mbyllur fjalën e saj me një falenderim për të gjithë pjesëmarrësit, të cilët tha ajo janë pjesë e këtij udhëtimi të jashtëzakonshëm, Presidentja e AAWO, konkludoi se : “Dhe, ja ku janë 30 vitet që treguan se çfarë pune të madhe dhe çfarë kontributi dhamë ne gratë shqiptare në Amerikë, për të bërë një ndryshim në jetën e grave dhe fëmijëve shqiptarë amerikanë . Së bashku, me ju të gjithë shqiptarët e Amerikës, ne(AAWO) do të vazhdojmë të shkruajmë trashëgiminin të komunitetit shqiptare në diasporë, do të tregojmë forcën dhe përparimin e grave shqiptaro-amerikane”, tha ajo.
Ceremonia e ndarjes së çmimeve vazhdoi me dhënien e këtyre çmimeve vjetore, nga presidentja Beti Bendo – Tsamblakos , dhe Eva Burnazi, e cila në emër të organizatës së grave AAWO, u dhurojë nga një buqetë/lule, secilës nga grave fituese të çmimit “AAWO Awards”
Çmimi “AAWO Lifetime Awards” – I takoi presidentes aktuale e degës së Floridës, Dr. Anna Kohen; dhe dy aktivisteve të hershme të komunitetit shqiptar znj. Shqipe Malushi, dhe znj. Shqipe Biba.
Çmimi i Filantropisë AAWO – aktivistes Fotini Allteni
Çmimi AAWO “Motrat Qiriazi” iu nda aktivistëve dhe themelueseve të kësaj organizate: Hane Selmani, Dr.Zana Dobroshi, Venera Bekteshi, Dr. Dolores Bushati, Dardanesha Andoni, Drita Shkurti, Loreta Stamo, Vjollca Jakupi, Sevina Cici, Ana Marku-Walsh, Elmira Muja, Liljana Gashi.
Në 30-vjetorin e Organizatës së Grave Shqiptaro-Amerikane “Motrat Qiriazi”, me Çmimin e Filantropisë AAWO – u nderua edhe biznesmeni I suksesshëm Zamir V. Gashi, si dhe me “ Çmimin e Gazetarisë AAWO”, gazeta Bota sot.
Photo/album Arbërie Hetemi – Muhaxherri
