Titulli i shkrimit janë vargjet e këngës që janë kënduar e këndohen më së shpeshti në gëzimet e manifestimet tona në vendlindje, por edhe në diasporë. Ato kanë ngritur peshë zemrat tona duke sjellë emocione të mëdha, dashuri e bashkim. Por jo vetëm kaq. Ato sjellin shpresë, fuqi e përparim të viseve shqiptare kudo brenda e jashtë Shqipërisë tonë të ndarë.
Këto vargje shprehin historikun e trojeve tona, të mbështjellë me emrin e atyre që na mbrojtën nga ç’bërja kur ne sa kishim lindur si shtet. Dhe mbështetja amerikane na shoqëroi pa kursim në çdo hap e moment tjetër kur shqiptarët ngriheshin për emrin e lirinë e tyre. Tashmë ne e dimë, se kjo nuk ka qenë një mbështetje e thjeshtë, por diçka vendimtare që ka përcaktuar fatet e Shqipërisë në historinë e saj, që nga luftërat e I-rë dhe e II-të botërore , deri tek pavarësia e Kosovës e shtet-formimi i saj. E megjithatë ne duhet të themi se një faktor i rëndësishëm për sigurimin e kësaj mbështetje përveç dashamirësisë pa kushte të udhëheqësve e popullit në SHBA, ka qenë dhe është kontributi i madh i Diasporës shqiptare këtu që nëpërmjet emrave e figurave patriotike të njohura punuan e luftuan pa u lodhur për të kërkuar të drejtat e shqiptarëve që akoma janë të pa bërë bashkë . Me plotë gojën mund të themi se Diaspora shqiptare e hershme apo dhe e re në Amerike, ka kontribut sa “ një Mal “ në çështjen tonë kombëtare, por misioni vazhdon.
Tashmë kanë kaluar vite e dekada dhe Diaspora shqiptare jo vetëm është rritur në numër e cilësisht kudo, por veçanërisht këtu në Filadelfia po shkohet drejt një “ Shqipërie të vogël “. Sigurisht jo fizikisht, por me bashkatdhetarët që përbëjnë komunitetin e këtushëm nga të gjitha trojet shqiptare prej rreth 30 mijë personash, me shkollën shqipe “ Gjuha Jonë “ prej 20 vitesh , me Qendrën social – kulturore që gumëzhin në çdo kohë prej rreth 22 vitesh, me brezin e ri që avancon çdo ditë në shkollim, shkencë, biznes etj, kemi sjellë Shqipërinë tonë në Amerikë.
Shoqata Mbarëshqiptare Atdhetare – Kulturore “Bijtë e Shqipes “, prej rreth 22 vitesh po punon intensivisht çdo vit e më mirë, që ky komunitet të ndjehet sa më i bashkuar e i lumtur edhe këtu larg atdheut, të ndjehet krenar me gjuhën, historinë e kulturën tonë kombëtare, duke i trashëguar ato ndër brezat e ardhshëm.
Për ti shërbyer sa më mirë këtij qëllimi, me ndjeshmërinë e mbështetjen e më shumë se 500 familjeve shqiptare që patën mundësi të kontribuonin, u ble para pesë vitesh një ambjent i ri për Qendër të komunitetit, i bukur, i bollshëm e me histori mbresëlenëse 250 vjeçare. Shumë pengesa objektive e subjektive patëm gjatë këtyre viteve për ta restauruar këtë ambient, ndërsa pak muaj më parë janë plotësuar të gjitha kërkesat ligjore dhe tashmë ka filluar edhe puna.
Por projekti i restaurimit të kësaj Qendre të re ku do të funksionojë edhe shkolla shqipe në përmasa më të mëdha në numër të nxënësve, kërkon përsëri kontribut financiar e punë nga bizneset e familjet shqiptare, të cilëve u është bërë thirrje nga këshilli drejtues i shoqatës që ta vlerësojnë këtë proces duke shprehur bujarinë e humanizmin si deri më tani. Përvoja jonë është shumë konkrete.
ALEX DAKU gjithmonë në vijën e parë.
I lindur në Radomirën rrëzë Korabit dhe i rritur në Tiranë, Alexi pasi mbaron shkollën e mesme në vendlindje , emigron për disa vite në Itali dhe përmes vështirësish arrin të futet në SHBA. Punoi si shef kuzhine në një restorant prestigjioz në Nju Jork për 5-6 vite dhe prej 11 vitesh udhëheq biznesin e tij të ushqimit e Realstate në Cherry Hill të Nju Xhersit, në AMICI Restorant dhe në Filadelfia. Pasuria e tij nuk është e madhe sa e disa bashkatdhetarëve këtu, por Alexi ka zemrën e shpirtin e madh. Kështu kanë qenë edhe paraardhësit e tij. Gjyshi Selim Daku, ish partizan në luftën për çlirim e ushtarak për disa vite pas çlirimit, shquhej për zgjuarsi, zotësi e xhymert. Po ashtu edhe babai i Alexit, Shefiti, i tillë e mbylli jetën.
Efektin e dominimit të trashëgimisë, populli e ka përjetësuar me shprehjen shumë domethënëse: “ Në mos rrjedhtë, do të pikojë”. Dhe kjo është shumë e dukshme edhe në rastin e këtij bashkatdhetari.
Ai na mblodhi sot në restorantin e tij të bukur “AMICI “ në Cherry Hill, nëpërmjet një Ftese publike të shpërndarë nga shoqata “Bijtë e Shqipes “ në FB, për një drekë me qëllim mbledhje fondesh për nevojat e punës në Godinën e re .
Pasi uroj mirëseardhjen e qëllimin e kësaj dreke nëpërmjet të cilës e gjithë shuma monetare që do të grumbullohet nga pagesa e biletave të pjesëmarrësve do të kalojnë në llogarinë e shoqatës “Bijtë e Shqipes”, z. Daku premtoi edhe një tjetër takim të tillë pas pak kohe, dhe ja kaloi fjalën kryetarit të kësaj shoqate z. Dritan Matraku. Pasi falenderon Alexin për këtë ftesë e organizim domethënës e kuptimplotë, z. Matraku i njohu pjesëmarrësit me bujarinë , mbështetjen e atdhedashurinë e dukshme të tij të shprehura ndër vite në nevojat e thirrjet e ndryshme për kontribute në komunitet. Aleksi është një emër i njohur në këto drejtime , vazhdoi ai , ndërsa na ka bërë krenar të gjithëve ne bashkatdhetarët e tij, veçanërisht gjatë periudhës të Covid 19 kur hapi dyert e këtij restauranti duke u shërbyer ushqim falas atyre që kishin nëvojë në atë kohë tepër të vështirë , apo duke dërguar e shpërndarë ushqimin në institucione të tilla si spitale , rajone të policisë etj. Prandaj në atë kohë emri i bisnesit të tij “ AMICI Restaurant “ u bë i dukshëm e i falenderuar nga gazetat e stacionet televizive të ndryshme si këtu në NJ ashtu edhe në vendlindjen tonë , Shqipëri.
Për të gjitha këto cilësi , mbështetje e kontribute të vazhdueshme zotit Alex Daku , iu akordua nga këshilli drejtues i shoqatës “ CERTIFIKATE MIRENJOHJE ” , e cila u dorëzua nga kryetari z. Dritan Matraku.
Në vazhdim ai i njohu pjesëmarrësit me ecurinë e punimeve të deritanishme në Qendrën e re apo punime që janë marrë përsipër nga bisnese të ndryshme , por edhe nevojat që kemi për të tjerë mbështetës për të përfunduar rindërtimi i objektit . Ai evidentoi kompaninë “ Ferko Plumbing “ që zotërohet nga Ferhat Ferko e cila përfundoi instalimin e sistemit te shkarkimit të ujrave nga jashtë objektit ( ku vlera e shpenzimeve ishte mbi $30 mijë) , dhe z. Altin Rrapushaj për fillimin e këtyre punimeve brenda tij. Gjithëashtu, Z. Mexhit Koboci, z. Roland Ismailanji dhe z. Albert Sula kanë marrë përsipër instalimet elektrike komplet me shpenzimet e tyre.
Më pas u ftua sekretarja e re e shoqatës , zonja e nderuar Julida Çepele e cila i dorëzoi bisnesmenit Ajet Pajollari Certifikatën e Mirënjohjes që këshilli drejtues i ka akorduar atij për mbështetjen e kontributet ndaj shkollës shqipe. Ndërsa zv. kryetari i shoqatës, z. Mexhit Koboçi ftoi z. Albert Sulaj dhe i dorëzoi atij vlerësimin nëpërmjet Certifikatës së Mirënjohjes që i ka akorduar gjithashtu ky këshill për kontribut të vecantë e marrje përsipër të punëve në Godinën e Re.
Por shoqata “Bijte e Shqipes “ sic thamë më sipër, ka 22 vite jetë . E në këtë morì vitesh janë evidentuar e vlerësuar shumë bashkatdhetar të tjerë të fushave e moshave të ndryshme , të cilët jo vetëm kanë lartësuar veten e familjet me arritjet e tyre , por të gjithë komunitetin e shqiptarinë anë e mbanë. Në veprimtarine e sotme ishin të ftuar edhe trashegimtar të familjes Risilia që falë asaj ne kemi sot qendrën ekzistuese të komunitetit por edhe shkollën shqipe , të cilët i kemi falenderuar e vlerësuar në cdo rast . Por sot kishim edhe një emër tjetër , që e rrit edhe më shumë frymën e deritashme të bashkimit e besimit për të cuar më tej misionin tonë :
Dr. Neurokirurg GENTIAN TOSHKEZI
Njeriu i ditur është edhe i thjeshtë . Prandaj Dr. Gentin e gjen gjithmonë pas punës , me miqtë e shokët e tij, me pjestar të komunitetit , në kafe e biseda ndihme për to. Ai ka lindur në Lushnje ndërsa ka mbaruar me Medalje Ari , Universitetin Shteteror në Tirane për mjekësi në vitet ’90 -të dhe është specializuar për Neurologji . Ne studimet e specializimet e mëpastajme në Paris, Vjenë , Bruxel e Amerikë , fiton specialitetin si Neurokirurg. Ka punuar në spitale me emër në Boston e Nju Jork , ndërsa para 7-8 vitesh vendoset në Filadelfia me familjen pasi fiton të drejtën për të punuar në specialitetin e tij në spitalin më të madh këtu “ Jefferson Hospital “ , ndër më të njohurit në Amerikë. Duke vlerësuar aftësitë e tij profesionale e njerëzore , në vitin 2020 shpallet në dhjetëshen e mjekëve më të mirë të këtij spitali në të gjithë Amerikën. Para pak muajsh është përzgjedhur si Drejtor i Departamentit të Neurokirugjisë në spitalin e Merylandit .
Eshtë vlerësuar para një viti nga shoqata “Bijte e Shqipes”me Certifikatën “ Nderi i Komunitetit “ , ndërsa nga Presidenti i Republikes të Shqiperise mban Medaljen : “Kalorësi iSkenderbeut “. Vleresimet në shqip janë më të pëlqyeshme për Dr. Gentin.
Në përshendetjen e tij në drekën e sotme tek Restaurant Amici , ai shtoi krenarinë shqiptare duke përmendur emrat e këngëtarëve të mëdhaja shqiptare në Amerikë : “ Operacionet neuro – kirurgjikale që ne zhvillojmë , zgjasin zakonisht 4-5 ore , thotë Dr. Genti . Prandaj vendosim radion në emisionet muzikore, per te punuar më qetësisht. Një ditë me rastisi dicka e rrallë . Në emisionin muzikor në radio dolën për të kënduar tri këngëtaret tona të mëdhaja ……..Bebe Rexha e Rita Ora . Pjestaret e ekipit po habiteshin kur unë po thoja për të parën “ Eshtë shqiptarja ime “ , pastaj për të trea radhazi të njëjtën shprehje , por me krenari të madhe …”
Ishte një atmosferë e bukur e krijuar pas kësaj përshendetje të doktorit , pasi cdo ditë e me shumë po shohim që geni shqiptar i përhapur në të gjithë botën , po rritet e shkëlqen më së miri , duke qenë një garanci e zhvillimit , konsolidimit e trashëgimisë tonë kombëtare.
Duke u kthyer në këtë shkrim tek ai që na ftoi në këtë drekë fondmledhëse , z. Alex – Astrit- Shefit Daku , mu kujtua një burrë i mencur shumë vite të shkuara nga i cili mbaj mend thelbin e bisedës me të : “ … Lutu e dhuro për paraardhësit tuaj . Dhe ne se nuk ke mundësi ti ndjekësh në veprën e tyre , të paktën mos i bëj pis me jetën tënde …” . Alexi dhuroi sot për “Bijte e Shqipes “ , përvec $ 7,300 dollar të grumbulluar nga dreka , edhe $200 të tjera dhuruar nga nëna e tij Lavdija.
Të lumtë Astrit !
Shpresojmë që shumë të tjerë si ju , ti japin frymë unitetit e besimit ashtu si më parë , për të përfunduar Qendren e Re dhe Shkollën Shqipe të komunitetit tonë , duke i dhënë më shumë jetë “ Shqipërisë së Vogël “ në Filadelfia.
Nga: Tajar Domi*
Ish kryetar i shoqatës “Bijtë e Shqipes”
Filadelfia, Tetor 2023
*Mesazhi i veprimtarisë së sotme tek Restaurant AMICI në NJ, me pronar atdhetarin Alex Shefit Daku.
