Kryetari i Bashkisë së Nju Jorkut Eric Adams, në kuadër të një turi takimesh me bizneset lokale të qytetit të New York-ut, të shtunën paradite qëndroi në qytetin e Bronx-it, për të diskutuar mbi sfidat me të cilat po përballen dhe se si qyteti po i ndihmon sipërmarrësit e këtyre bizneseve t’i kapërcejnë ato.

Si njofton gazeta “Dielli” i Vatrës, edicioni i saj online, Kryetari i Bashkisë së Nju Jorkut Eric Adams, në takimin e zhvilluar në biznesin shqiptar “Bato Coffee and Wine” në Bronx, ka pasur një bisedë informuese dhe falënderuese me bizneset shqiptare në Bronx, duke e vlerësuar punën për shërbimin, fuqizimin ekonomik, rritjen e punësimit, forcimin e pozitave në fushat përkatëse dhe ndihma e madhe në zinxhirin ekonomik të qytetit e shtetit të Nju Jorkut.

Aktivisti i njohur i komunitetit Harry Bajraktari, i cili mori pjesë në këtë takim dhe postoi në llogarinë e tij personale në rrjetin social facebook, një set me fotografi nga takimi, thotë se ky Ishte një takim i mrekullueshëm që të takohet e të bisedojë me kryetarin e bashkisë, së Nju Jork-ut, Eric Adams, ndërsa shprehet:

“Faleminderit Mark Gjonaj, Valentina Gojcaj, Vera & Ismer Mjeku, që na bashkuat të gjithëve ne, liderët e biznesit shqiptarë ne Bronx, për një event të madh që të mbështesim kryetarin Eric Adams” shkruan Bajraktari.

Ndërkohë Kryetari i Këshillit Kombëtar të Diasporës, z.Mark Gjonaj-ish anëtar i këshillit të bashkisë së New York-ut, një nga organizatorët kryesorë të këtij takimi, thotë se “Ishte kënaqësi të mirëprisnim kryetarin e bashkisë së NYC , Eric Adams, në qytetin e Bronx-it, për të diskutuar gjithçka që ai po bën për ta çuar qytetin tonë përpara.”

Në këtë takim mori pjesë edhe Kryetari i Vatrës z.Elmi Berisha, i cili si shkruan Dielli, pati rastin të shkëmbej mendime me kryetarin e Bashkisë së Nju Jork z.Eric Adams.

“Ishte një bisedë informuese dhe falënderuese me bizneset shqiptare në Bronx, duke i vlerësuar për shërbimin, fuqizimin ekonomik, rritjen e punësimit, forcimin e pozitave në fushat përkatëse dhe ndihma e madhe në zinxhirin ekonomik të qytetit e shtetit të Nju Jorkut” shkruan Dielli për takimin.

Kryebashkiaku i Nju Jorkut, Eric Adams është shfaqur në këtë takim me biznesmenët e suksesshëm shqiptar në Bronx, duke bërë fotografi me një plisë në kokë me përkrenaren e Skëndërbeut në “ballë”, teksa ka bërë me të dyja duart edhe shqiponjën, simbolin kombëtar shqiptar, në mbështetje të bizneseve të vogla në qytetin e Bronxit.