Daniel Bom nuk është vetëm një turiste e zakonshme rrugëve të Tiranës. Ajo ka ardhur nga Holanda në Shqipëri si nomade digjitale. Përmes teknologjisë dhe platformave online ajo mund të punojë kudo. Shqipëria për të ishte destinacion i pazbuluar.

“Po kërkoja se ku mund të shkoj gjatë verës për të punuar, dikush më sugjeroi Shqipërinë dhe kur kërkova në internet u bëra shumë kurioze.”

Por jo vetëm nga Europa, në Shqipëri kanë ardhur si punonjës lëvizës digjital edhe qytetarët e largët të përtej Oqeanit Atlantik.

“Jam nga Kanadaja, jam në Tiranë për herë të parë për të punuar si nomade digjitale, kam biznesin tim online kështu që mund të punoj nga kudo.”

Pas një muaji qëndrimi në Shqipëri, ata thonë se këtu është një mjedis i sigurt dhe se kostot janë jo shumë të larta për nomadët digjitale.

“Kostoja e jetesës është e përballueshme, njerëzit janë të këndshëm, po ashtu të marrësh një vizë pune nuk është shumë e vështirë.”

“Përfundimisht do ua rekomandoj Shqipërinë të tjerëve nomadë digjitalë. Është padyshim një vend shumë mikpritës, natyra është shumë e bukur dhe njerëzit të ndihmojnë shumë.”

Aktualisht në Shqipëri mendohet të ketë rreth 500 punonjës lëvizës digjitalë. Përveç Tiranës, Durrësi, Shkodra dhe Vlora janë qytetet ku po qëndrojnë pjesa më e madhe e tyre.

Përmes lehtësirave, si heqja e detyrimit për të paguar rezidencë tatimore për një vit, po synohet rritja e nomadëve digjitalë në Shqipëri. Kjo sepse në shtetet e BE, çdo nomad digjital sjell mesatarisht rreth 1,800 € në muaj, 10 herë më shumë të ardhura në ekonominë lokale, sesa një turist standard i zakonshëm./Tema/