Një skenë e re politike formohet pas rezultateve të zgjedhjeve të djeshme parlamentare në Greqi, me fitoren e thellë të partisë qeverisëse Demokracia e Re, që ka tejkaluar çdo parashikim, madje edhe të exit polls.
Humbje e rëndë e opozitës SYRIZA, rritje e partisë së tretë PASOK dhe të Partisë Komuniste të Greqisë.
Pesë parti greke kanë siguruar mandate për në parlamentin e ardhshëm grekë, në raundin e parë të zgjedhjeve.
Kryeministri Mitsotakis sot do të takohet me presidenten e Greqisë për të marrë një urdhër të ri të formimit të qeverisë që mesa duket do të jetë qeveri teknike, për të drejtuar vendin në raundin e dytë zgjedhor, siç parashikon procedura, që po zbatohet për herë të parë në vend.
Një ligj i qeverisë SYRIZA që sot rezulton në një autogol, përsa i përket formës së numërimit së votave dhe ndarjes së mandateve.
Gjatë ditëve të ardhshme e pa humbur kohë pritet që Kryeministri Mitsotakis të kërkojë akte të përshpejtuara në formimin e qeverisë e betimin e parlamentit të përkohshëm, me qëllim që të arrihet një raund i dytë në 25 qershor. Në rast se afatet kohore tejkalojnë sa parashikon kushtetuta greke, atëherë raundi i dytë do të zhvillohet në 2 korrik.
Këto pritet të shpallen nga vetë Kyriakos Mitsotakis gjatë ditës së sotme.
Klimë e rëndë në SYRIZA dhe mbledhjen e përgjithshme të krerëve të partisë sot, pas rezultateve katastrofale. Një reformë e brendshme e thellë kërkohet në opozitën greke të Aleancës Progresiste, që nuk ka arritur të bindë për një koalicion të mundshëm qeveritar. Pikërisht ky është edhe vlerësimi i parë i humbjes së thellë, mungesa e një koalicioni që do të mundësonte zbatimin e një programi të sigurt qeverisës 4 vjeçar, me stabilitet e progres.
Populli grek, megjithë trajtimin e pandemisë, shifrën e lartë të të vdekurve pavarësisht lockdown të egër e më të gjatë të Europës, aksidentin më tragjik të historisë hekurudhore të vendit në Tembi me 57 viktima, zjarret e katastrofa ekologjike në ishullin Evia, Atikë e nëpër Greqi, shtrenjtësinë e jashtëzakonshme që po rrënon çdo ditë ekonominë familjare, ka votuar gjithsesi një tjetër mandat të qartë për partinë konservatore të djathtë “Demokracia e Re”.
Në raundin e dytë pritet veçse konfirmimi i këtij urdhëri të qartë.
Përsa i përket kandidatëve shqiptarë, duhen përgëzuar për fushatën me mjete modeste e mbështetje vetëm morale nga partitë përkatëse, por që me shumë guxim e plot sakrifica kanë arritur të renditen denjësisht ndaj mjaft kandidatëve grekë, që padyshim gëzojnë tjetër rreth të gjerë miqësor e familjar në vend.
Sot komuniteti shqiptar numëron rreth 10000 vota, e konsiderojmë arritje emocionale, herën tjetër do të shumëfishohen.
Kandidatët shqiptarë arritën të sigurojnë këto rezultate:
-Antilian Koxhaj SYRIZA 3141 vota
-Viola Makrina Kosti SYRIZA 2802 vota
-Angjelos Dhionisis Jahollari SYRIZA 999 vota
-Niko Bilika Pasok 822 vota
-Fatos Malaj-Pasok 746 vota
-Pati Vardhami Mera 25 (Diem 25) -1261 vota
-Sidorela Kalthi Partia Komuniste 152 vota
Lexo edhe: Sot Greqia voton/ Për herë të parë në garë 7 kandidatë shqiptarë
*
Shifrat deri sot paradite, pjesëmarrje 99,65%, vota të pavlefshme 2.61%
Demokracia e Re 40.79% -146 deputetë
Syriza 20.07% -71 deputetë
PASOK 11.46% -41 deputetë
Partia Komuniste Greke-7.23% 26 deputetë
Zgjidhja Greke 4.45% -16 deputetë
