Kastriot Xhon Marku, mësues muzike, artist dhe instrumentist shqiptar i ardhur nga Prizreni i Kosovës, ishte një nga drejtuesit e performancës së artistëve të vegjël në manifestimin artistik të 24 prillit 2023 në Londër.

Ai është një tjetër krenari shqiptare në Mbretërinë e Bashkuar!

Jep kontributin e tij vullnetar edhe si pjesë e grupit themelues në “British Albania Artist”.

Prej 33 vitesh ai ushtron profesionin e tij pa ndërprerje si mësues arti, në shkolla dhe kolegje, me fëmijë dhe të rinj të tërhequr pas veglave muzikore si alternativë hobi apo karrire në vazhdim.

Së fundmi bëhet fjalë për koncertin madhështor i cili u organizua në Londër, në një nga skenat më të njohura të artit londinez, në “Royal Albert Hall”. Ku më shumë se 2000 pjesëmarrës, fëmijë të moshave të ndryshme, të talentuar, në interpretime të ndryshme artistike (vegla muzikore apo kanto) nën drejtimin edhe të rofesorit të tyre shqiptar, shpalosën bukurinë e pasionit dhe të punës me artin që në moshë të vogël.

Organizimi i këtij aktiviteti jashtëzakonisht të madh u prit me entuziazëm dhe pjesëmarrje të gjerë nga publiku anglez dhe nga të gjitha komunitetet e integruara në Mbretërinë e Bashkuar.

Mbështetja dhe besimi kryesor, për realizimin e këtij eventi unik, erdhi kryesisht nga “Camden Music Service” i quajtur edhe Festivali i Muzikës Camden.

“Arti dhe sporti janë mundësitë më të mira të edukimit jo vetëm pasional dhe kulturor por edhe diapazonal të një fëmijë pasi i japin okazionin shprehës për ta investuar kohën në sfidë dhe për t’u bërë konfident me publikun artëdashës në rastin e këtij koncerti “ – shprehet Kastrioti.

Dhe të jesh një mësues është akoma edhe më shumë një përgjegjësi  që jo vetëm të paguan shpirtërisht por edhe si edukator ku të është besuar një gjeneratë.

Shqiptarëve profesionistë, në Angli, iu besohet edhe edukimi i gjeneratave!