Tashmë objekti i ri i shqiptarëve në Filadelfia, që do të destinohet për Qendër komunitare e shkollë shqipe për fëmijët tanë, është një realitet prej më shumë se 4 vitesh. “Bijtë e Shqipes” këtu janë të zotët e këtij vendi, pasi e blenë atë, falë angazhimit e kontributit të disa qindra familjeve shqiptare. Në atë kohë për të gjithë që një gëzim i madh, dhe ishte e menjëhershme puna e shumë bashkatdhetarëve, si përgjigje e këtyre emocioneve që u krijuan. Është shkruar shumë për këtë vrull të jashtëzakonshëm. Megjithatë gjërat nuk ecën siç qenë parashikuar. Pandemia dhe statusi historik i këtij objekti, krijuan vonesa disa vjeçare për të realizuar punimet për restaurimin e tij.
Por tani gjithçka nga ana ligjore është gati, për të filluar punën së bashku. Dhe për të mos humbur kohë, kryesia e shoqatës “Bijtë e Shqipes” nëpërmjet kryetarit të saj, z.Bujar Gjoka, përcolli një Mesazh drejtuar bizneseve që ushtrojnë aktivitetin e tyre në Filadelfia e rreth saj, për një takim ditën e Premte, me datë 3 Mars 2023 në orën 6 të mbrëmjes, që të përcaktohen hapat konkret që duhet të ndërmarrim për të përfunduar punën e nisur. Megjithë angazhimin që ka dita e premte për bizneset, disa prej tyre së bashku me një pjesë të kryesisë të shoqatës e veprimtar të saj, gjetën kohë për tu bërë pjesë e këtij takimi.
Kryetari i shoqatës z. Bujar, hapi takimin duke falenderuar të gjithë pjesëmarrësit dhe duke informuar ata për nevojën që kemi të bëhemi bashkë përsëri e të realizojmë atë projekt që kemi nisur vite me parë, por që pavarësisht përpjekjeve tona nuk u arrit të bënim atë që mund të bëhej që në vitin e parë pas blerjes. Sigurisht, për punë të mira asnjëherë s’është vonë. Veçanërisht kur fjala është për Qendrën tonë që do të jetë shumë funksionale e në radhë të parë si shkollë shqipe. Ne do të vazhdojmë të vlerësojmë çdo dollar të dhuruar nga çdo pjesëtar i komunitetit dhe të ruajmë transparencën para tyre. Më tej z. Bujar sqaron: Në bisedë paraprake me z. Arti Ismailanji, që si shumë të tjerë zotëron një kompani ndërtimi si “General Construction” e që njeh ligjet e kësaj fushe, ja bëmë prezent shqetësimin e nevojën tonë për të marrë përsipër menaxhimin e punimeve deri në përfundim të projektit. Ai e mirëpriti këtë, prandaj e falenderojmë.
Pas fjalës së z. Bujar, në takim filloi biseda ku fryma e dëshira e çdo njerit ishte që sa më parë të vetë organizohemi për të kryer atë çfarë kërkohet në një afat sa më të shkurtër. Arti, i cili ka dhënë një kontribut jo të vogël për demolimin e pastrimin e godinës që në fillim, u tha pjesëmarrësve se kjo punë na përket neve, bizneseve shqiptare këtu në Filadelfia, dhe unë mendoj se duhet të bëhemi të gjithë pjesë e kësaj fushate, me mundësitë që ka secili. Dikush mund të marrë përsipër kryesimin e grupeve të punës sipas specialiteteve, dikush tjetër të jap ndihmesën me fuqi punëtore e ndonjë tjetër të kontribuojë financiarisht. Të gjithë duhet të humbim nga pak kohë për ti dhënë emër komunitetit tonë, me një Qendër model që do ndërtojmë e që afërsisht do të kërkojë rreth $ 250 – $300 mijë dollarë. Unë pranova të jem ligjërisht i ngarkuar në këtë punë, por në se dikush nga shokët nuk e shikon me vend angazhimin tim këtu, unë tërhiqem. Por nuk kishte se si të mos mbështetej nga të gjithë shokët e miqtë tanë aty, duke ja njohur edhe aftësitë organizuese e patriotizmin që manifeston Arti. Ai kërkoj që të jemi konkret në angazhime. Dhe ashtu u procedua në vazhdim. Biznesmenët Mexhit Koboci (i cili është i zgjedhur edhe anëtar i kryesisë) e Roland Ismailanji, morën përsipër, që duke thithur edhe ndihmën e bizneseve të tjera të fushës elektrike, të përfundojnë totalisht këtë lloj servisi në object. Bedri Allaraj, premtoi të drejtojë punën për instalimin e sistemit të ngrohjes e të ftohjes, duke u bërë thirrje edhe shokëve te tjerë që nuk ishin të pranishëm, por që menaxhojnë biznesin e kësaj fushe, të bëhemi bashkë për ta përfunduar sa me shpejt. Ndërsa për punimet hidraulike (plumbing), do të bisedohet me bisnesmenin e suksesshëm Ferhat Ferko, i cili për arsye të forta nuk ishte i pranishëm, që të udhëheqë punimet e këtij lloj duke bashkëpunuar edhe me të tjerë. Dëshirën për të ndihmuar në këtë proces ka shprehur më parë edhe bisnesmeni Astrit Hoxha, i cili u kontaktua në telefon nga kryetari i shoqatës, dhe premtoi që me kompaninë e tij të përfundojë framing e objektit. Me një ndjenjë të lartë përgjegjësie diskutoi edhe dibrani me banim në Nju Xhersi, z.Imer Dedja, duke bërë thirrje që të angazhohemi të gjithë në këtë aksion atdhetar. Ai dhuroi një check prej një mijë dollarësh, që hapi këtë fushatë. Shumë të tjerë si Agim Bajrami, Bastri Bajo, Dhimo Xhorxhi, Eldion Pajollari, Defrim e Ajet Pajollari, Besim Fana, Sokol Allaraj, Gezim Tafa, Ruzhdi Karaj, Vullnet Agolli etj.. i dhanë mbështetje të fuqishme fushatës me diskutimet e mendimet e tyre, që do të kthehen në kontribut konkret në object.
Ky takim bashkëatdhetarësh, anëtar ose jo të shoqatës “Bijtë e Shqipes”, shprehu më së miri dëshirën e shqiptarëve për ti parë ato bashkë kudo, të lartësuar e të fuqishëm gjithmonë, e sidomos me një Qendër dinjitoze që do të na bëjë të njihemi e të jemi të kërkuar.
Pra është koha ta përgatisim këtë Qendër. Dhe mundësinë e kemi. Janë mbi 350 subjekte biznesi të shqiptarëve në Filadelfia, që po rriten nëpërmjet punës së tyre të ndershme e të lodhshme, sigurisht. Ndoshta të gjithë duhet ta ndjejnë veten si detyrues, për të vendosur një tullë me kontributin e tyre në këtë projekt, për të qenë krenar nesër me të.
Kontributi është pjesë e brendshme e qenies të çdo shqiptari. Shumë prej tyre kanë dëshirë të madhe të shohin jo vetëm familjet, por edhe të gjithë komunitetin të jetë krenar me arritjet e tij. Kjo i shtyn një grup pensionistësh, anëtar e veprimtar të shoqatës, të jenë ndër kontribuuesit e parë në çdo fushatë, qoftë për fatkeqësi, për tërmetin, për Godinën e re etj. Një pjesë e tyre ishin edhe në takimin me bizneset. Dukeshin plot dëshire për tu shprehur. Por nuk folën, për të mos ua prishur vrullin e bukur më të rinjve. Shtërnguan duart me to, ne shenjë urimi. E megjithatë nuk harruan që në fund, nga kursimet e tyre, të dhuronin diçka. Dhuruan pra, Sami Zaimaj $100, Lutfi Brami $100, Niko Bani $ 100, Hys Hasa $100, Vangjel Haxhistasa $100 e Eqerem Murataj $100 (dy te fundit nuk ishin present, por i dërguan dollarët) si dhe Llazar Vero $200.
Është pak për ti falenderuar këta njerëz të mirë, dhe kjo nuk mjafton. Ata duhen ndjekur. Dhe këtë, bashkatdhetarët tanë e kanë bërë sa herë që u është kërkuar ndihma e tyre. Do ta bëjnë edhe këtë herë, sigurisht.
Ndërsa biznesmenët do të mblidhen përsëri në mbrëmjen e dhurimit të fondeve që do të organizohet me dt. 25 Mars 2023, e për të cilën do të këtë njoftim të veçantë.
Deri atëherë, gjithkush mund të dhurojë për godinën e re të shoqatës duke bërë pagesa me check ose para cash tek godina e shoqatës, ose nëpërmjet aplikacionit Venmo për “Bijtë e Shqipes” Philadelphia ose online në llogarinë e shoqatës “Bijte e Shqipes”, të cilën do ta gjeni lehtësisht në WEB-in e saj www.bijtëeshqipes.org.
Tajar DOMI
Filadelfia , 5 Mars 2023
