Dita e sotme është një ditë e rëndësishme për të gjithë shqiptarët, për shqiptarët e Kosovës që jetojnë prej 15 vitesh të lirë, e për shqiptarët në Diasporë që kanë mbështetur e kontribuar në çdo sekondë për lirinë e saj. Falë angazhimit të saj dhe mbështetjes që i ka dhëne kauzës së Kosovës së Lirë sot mërgata feston po njësoj si edhe shqiptarët në troje.
Angazhim të cilin e ka theksuar edhe zv. Minsitrja për Punët e Jashtme dhe Diasporën znj. Liza Gashi në mesazhin e saj për “Diaspora Shqiptare”.
Mesazhi i plotë:
“Sot festojmë 15-vjetorin e Pavarësisë së Republikës sonë. Rruga drejt pavarësisë dhe lirisë ishte e gjatë dhe kërkoj shumë sakrifica nga të gjithë ne. Ndërsa përkujtojmë këtë hap vendimtar në historinë e popullit tonë, le të kujtojmë ata që luftuan me guxim e krenari, dhe të nderojmë të gjithë ata që dhanë jetën e tyre për ta bërë republikën tonë një realitet.
Në këtë ditë gjithashtu mbajmë në mendje dhe jemi përjetësisht falenderues për mërgatën tonë, e cila gjithmonë është pranë Kosovës dhe asnjëherë nuk kursej asgjë për ta bërë dhe forcuar Republikën tonë të dashur.
Ky përvjetor i 15-të i Pavarësisë, le të jetë ditë feste por edhe moment reflektimi për punën e madhe që kemi përpara në nderimin e paraardhësve të lirisë si dhe për të krijuar një Republikë ku fëmijët tanë mund ti realizojnë të gjitha ëndrrat e tyre”.