Më 2 janar 1889, në Lecce të Italisë, në një familje Arbëreshe, lindi një nga personalitetet më të shquara të kulturës sonë Raffaele Attilio Amedeo Schipa, i njohur si Tito Schipa, këngëtar dhe artist me famë botërore.
Ai kurrë nuk e mohoi origjinën e tij dhe gjakun shqiptar dhe në vitin 1959 vizitoi Shqipërinë, vendin e paraardhësve të tij. Gjatë kësaj vizite, ai mori pjesë në disa aktivitete artistike, kulturore dhe sportive. Tito Schipa luajti rolin kryesor në veprat më të njohura si: “Traviata”, “Somnambul”, “Berberi i Seviljes”, “Don Pasqual”, “Elixiri i Dashurisë” etj.
Ai studioi në Milano dhe bëri debutimin e tij në moshën 21 vjeç në 1910 në Vercelli. Më pas u shfaq në të gjithë Italinë dhe në Buenos Aires, Argjentinë, duke u bërë kështu një nga tenorët më të mëdhenj të shekullit XX.
Nga 1929-1949 performoi rregullisht në Itali, përfshirë edhe La Scala, Milano dhe në Opera të Romës. Ai u kthye në Buenos Aires për të kënduar në vitin 1954.
Schipa bëri shumë këngë gjatë karrierës së tij, duke filluar në Itali në vitin 1913. Ai gjithashtu regjistroi disa tango, disa prej të cilave u krijuan prej tij në spanjisht, kryesisht në Buenos Aires dhe New York. Falë turneve të tij të hershme të Amerikës Latine, Schipa ishte një tenor shumë i njohur edhe në Amerikën Latine.
Schipa u tërhoq nga skena në vitin 1958 për të dhënë mësim zëri, në Budapest. Vdiq në moshën 77-vjeçare në Manhatan më 16 dhjetor 1965.
Djali i tij, Tito Schipa Jr. është gjithashtu një kompozitor, tekstshkrues, producent, shkrimtar dhe aktor.
