“BiblioTech” është nisma më e re e cila synon të ripërtërijë funksionin dhe përdorimin e hapësirave të bibliotekave publike të lagjeve dhe bashkive në vend.
Nisur në 2019 si iniciativë e qendrës Albania Sustainable Development Organization – ASDO me Bashkitë Tiranë, Korçë dhe Shkodër dhe UNICEF Shqipëri, “BiblioTech” kishte qëllimin që komunitetet, kryesisht të rinj të pasionuar pas Teknologjisë së Informacionit dhe Komunikimit, të kenë një hapësirë publike dedikuar pasioneve, talenteve dhe dëshirës së tyre për të mësuar mbi këto fusha, pranë bibliotekave ekzistuese.
Në “BiblioTech” synohet përfshirja e vazhdueshme e fëmijëve, të rinjve dhe ekspertëve, me dëshirën që përmes përvojave inovative dhe praktike të të mësuarit, atyre t’u rriten njohuritë dhe aftësitë digjitale dhe të fitojnë më shumë njohuri mbi teknologjinë dhe mbrojtjen online.
Në të njëjtën kohë “BiblioTech” u jep një mundësi startup-eve dhe bizneseve të vogla që të zhvillojnë më tej projektet e tyre në fushën e TIK-ut si dhe të provojnë veten në sfida kombëtare siç është “BiblioTech Challenge”.
Për momentin BiblioTech funksionon në bibliotekën e Korçës “Thimi Mitko”, atë të Shkodrës “Marin Barleti” dhe në tre biblioteka në Tiranë: “Musine Kokalari”, “Misto Treska” dhe “Hamit Beqja”, “Aleksandër Xhuvani”, me dëshirën për të shtuar më shumë biblioteka në listën e bashkëpunëtorëve të nismës. Hapësirat e “BiblioTech” shërbejnë dhe si mjedise të përshtatshme për sesione informuese, workshop-e dhe aktivitete të tjera që kanë lidhje me kompjuterat, rrjetin, websitet, teknologjinë dhe sigurinë online. Ajo që është e rëndësishme është që aktivitetet pranë këtyre hapësirave mendohen dhe planifikohen sipas kërkesave dhe dëshirave të parashtruara nga vetë komuniteti, dhe në shërbim të komunitetit.
Një nga synimet e ASDO është zhvillimi i qëndrueshëm, që nënkupton nisma të cilat mund të vetëmbahen dhe zhvillohen dhe për “BiblioTech” jemi munduar ta arrijmë përmes rritjes së kapaciteteve burimore dhe njerëzore të bibliotekave, duke trajnuar stafin lokal dhe duke dorëzuar kompjutera, tableta dhe kite kodimi-robotike në mënyrë që të rritet frekuentimin e bibliotekave dhe përdorimi i tyre sa më efikas dhe duke iu përgjigjur nevojave të kohës.
Nëse dikush ju pyet se çfarë është “BiblioTech” dhe pse duhet frekuentuar, dijeni se janë hapësira publike në të cilat:
- mund të punosh vetëm ose në grup duke përdorur kompjuterat dhe tabletat pranë bibliotekës
- mund të ndjekësh trajnime dhe sesione informuese mbi përdorimin e sigurt të internetit dhe shmangies së rreziqeve
- mund të mësosh Scratch, Coding, Python, bazat e robotikës dhe më shumë
- mund të përdorësh një lidhje të sigurtë interneti, që mbron minorenët nga sitet e rrezikshme
- mund të organizosh ti vetë një aktivitet mbi Teknologjinë e Informacionit dhe Komunikimit.
Viti 2023 do të vijë me një paketë të plotë lidhur me tema teknologjike, grafik design, internet i sigurt e më shumë. Na ndiqni nëpërmjet rrjeteve sociale dhe mos hezitoni të na kontaktoni që të bëheni pjesë e komunitetit BiblioTech.
Për më shume info na ndiqni në:
https://www.facebook.com/asdoalbania/
https://www.instagram.com/a.s.d.o_/
https://www.linkedin.com/company/83489647/admin/
