Organizata “GERMIN” ka lançuar versionin BETA të platformës digjitale të Programit për Angazhimin të Profesionistëve nga diaspora.
Ky program synon të mbështesë angazhimin e profesionistëve nga diaspora në vendet e origjinës, me qëllim transferimin e njohurive dhe përvojës në institucione publike, organizata të shoqërisë civile dhe biznese.
Programi aktualisht mundëson angazhimin afatshkurtër, duke filluar nga 3 javë deri në 6 muaj.
Platforma mundëson lidhjen mes dy palëve, profesionistëve nga diaspora që duan të kontribuojnë në Kosovë & Shqipëri dhe te entiteteve që shprehin interesim për të angazhuar profesionistë të diasporës nga vendet amë. Platforma mundëson përputhjen automatike të profileve të profesionistëve nga diaspora me nevojat e entiteteve pritëse në vendet amë, në pozitat e shpallura në të.
Entitetet vendore që duan të angazhojnë profesionistë nga diaspora, inkurajohen të regjistrohen dhe të publikojnë shpalljet për profilet për të cilat kanë nevojë.
Platforma synon edhe regjistrimin e bizneseve nga diaspora dhe atyre lokale, me qëllim lidhjen dhe rrjetëzimin mes tyre. E njejta procedure e regjistrimit vlen edhe për ta.
Platforma mbron të dhënat e të regjistruarëve sipas standarteve të Rregullores Europiane për Mbrojtjen e të Dhënave (GDPR).
PËRDOR PLATFORMËN – REGJISTROHU TANI!
I nisur në vitin 2019, Angazhimi i Profesionistëve të Diasporës (EDP) është një program që synon të sjellë profesionistë të diasporës nga e gjithë bota. Qëllimi i programit është që profesionistët shqiptarë të Kosovës, Shqipërisë, Maqedonisë së Veriut, Malit të Zi dhe pjesës jugore të Serbisë, të cilët jetojnë jashtë vendit, kanë studiuar dhe kanë punuar atje të sjellin në atdheun e tyre përvojën, ekspertizën dhe njohuritë në vendin e tyre, me synimin për të ndihmuar vendin drejt zhvillimit.
Në vitin e parë, me mbështetjen e Deutsche Gesellschaft für Internationale Zusammenarbeit (GIZ), programi Angazhimi i Profesionistëve të Diasporës ka angazhuar me sukses 30 profesionistë nga Gjermania (15 në Kosovë dhe 15 në Shqipëri) dhe ka krijuar një grup prej më shumë se 200 profesionistësh të gatshëm që të angazhohen në të ardhmen e afërt në atdheun e tyre.
Përmes studimeve të shumta, programi Angazhimi i Profesionistëve të Diasporës ka identifikuar nevojat e institucioneve në vendlindje si dhe aftësitë që diaspora është e gatshme të kontribuojë.
