Drejtoresha e Agjencisë Kombëtare të Diasporës Znj.Sonila Hysi e pranishme në takimin “Sfidat dhe mundësitë e inkuadrimit të Diasporës në bashkëpunime shkencore kombëtare dhe mbarkombëtare“ që u mbajt në Mynih prezantoi strukturat e ngritura për organizimin e Diasporës. Hysi gjithashtu u ndaj në strategjinë që institucioni që ajo drejton ka për organizimin e një baze të dhënash për regjistrimin e Diasporës.

“Pasi u vu re mungesa e një Këshilli Koordinues për Diasporën shkencore, vendosëm në bashkëpunim me znj. Liza Gashi zëvendës Ministre e Punëve të Jashtme dhe Diasporës realizimin e shpejtë të këtij projekti”, u shpreh ajo.

Gjatë këtij takimi me qëllim thellimin e bashkëpunimit drejt integrimit të Diasporës shkencore dhe profesionale në procese të zhvillimit të vendeve tona si dhe për të hapur edhe rrugën institucionale të bashkëpunimit, Drejtoresha e Agjensisë Kombëtare të Diasporës të Shqipërisë, znj. Sonila Hysi dhe Kryetari i Shoqërisë së akademikëve shqiptarë DIJA e.V., z. Eshref Januzaj, nënshkruan marrëveshje bashkëpunimi në mes të Agjencisë Kombëtare të Diasporës dhe Shoqërisë DIJA nga Mynihu.

Kjo marrëveshje do të krijoj hapësira për rrjetizimin e expertëve dhe angazhimin e Diasporës shkencore dhe profesionale në zhvillimin e projekteve në vendet e origjinës.