Poetja shqiptare Irma Kurti ftohet në ekspozitën “75 vjet në evolucionin e artit”, organizuar nga Shoqata Artistike Legnanese, në Kështjellën Visconteo të Legnanos. Në datën 26 nëntor 2022 në mjedisin e kështjellës u organizua eventi kulturor “Poezitë e vjeshtës” në drejtimin e poeteshës Rosy Gallace.

Merrnin pjesë dashamirës të artit dhe kulturës si dhe poetë bashkëkohorë të njohur në panoramën kulturore italiane si: Rita Iacomino, Nunzio Buono, Dario Marelli, Gianluca Regondi etj. Në këtë event u lexuan poezitë e poetëve të pranishëm të frymëzuar nga pikturat e ekspozuara.

“Ishte një aktivitet vërtet i bukur dhe emocionues” – thotë poetja shqiptare. “Provova emocionin të shikoja poezitë e mia të ekspozuara përbri me pikturat nga e kishin marrë frymëzimin, por gjithashtu pata mundësinë të takohesha me poetë italianë, disa prej të cilëve i njihja vetëm me emër.”

“Piktura dhe poezia bashkohen në këtë rrugëtim të bukur – u shpreh Roberto Trucco, President i Shoqatës Artistike Legnanese. “Sot në këto 75 vjet ne mund të shohim sesi – shprehet ai – ka ndryshuar bota e artit, por edhe ajo e poezisë”.

Në këtë event diskutoi edhe Cinzia Della Vedova, psikologe, duke shpjeguar krijimtarinë nga pikëpamja psikologjike dhe biologjike.

Poezitë e dhjetë autorëve të pranishëm në këtë aktivitet (të përzgjedhur nga 60) u lexuan nga Giorgio Orsini. Ekspozita do të qëndrojë e hapur deri më 8 janar 2023.